《我的MK妹同桌》第二季: 210

「我哋之前相處得好好，我好明白，如果唔係我哋都唔會一齊咁耐，經歷過中學、大學，我亦都相信就算出嚟做嘢，我哋都唔會點變。」
 
「只不過依家我唔想見到你因為我而辛苦⋯⋯我知以你嘅性格實會陪我捱⋯⋯」
 
「你會，我知你一定會。」
 
「中學嗰陣就知，你係會堅持落去嘅人嚟。」
 
「記唔記得我哋中學分手嗰晚？你係補習樓下等我。」呀詩若無其事咁講返起以前嘅事。
 




已經過咗五、六年啦，唔數下都唔知原來過咗咁耐，有種記憶錯亂嘅感覺。
 
「記得，點會唔記啊？」我苦笑道。
 
我哋甚少講起分手嗰陣時嘅嘢，好似不約而同大家都有個共識，唔開心嘅事就唔好提返起，對現實無任何幫助。
 
「嗰晚由補習社出嚟，我就知你點都會跟埋嚟，雖然你嗰陣係巴士度無追上嚟，但係喺重要嘅位上面，你唔會走咗去。」
 
「所以我信你點都會陪我捱過去。」
 




「但我唔想。」呀詩坐返好，又再直望河岸。
 
「依家嘅我就算同你出嚟，我都開心唔起，我都以為你過到嚟，情況會有所改變，但我就係咩都諗得好負面，我無辦法真正咁開心起嚟，覺得你好快就會走，到時候我又自己一個人係度，我不停咁要自己唔好依賴你咁多，同埋我都唔肯定自己返到香港就一定會好得返。」
 
「我唔想因為咁綁你係我身邊，我唔想你跟埋我一齊辛苦。」呀詩盡力令自己平靜。
 
「我唔想做累人累物嗰個。」
 
「由細到大，我都唔想做累人嗰個，因為我已經俾人拖累個人生拖累得好緊要，所以盡可能唔麻煩到人，我都會自己嚟。」
 




此時此刻，我忍唔住打斷呀詩講嘅嘢，唔單止係佢，我都有啲激動。
 
其實呀詩講到好明，我心入面好清楚呀詩依家想點樣。
 
「但係你唔會咁樣維持一世㗎嘛，到你好返嗰陣，你唔會覺得可惜咩？做呢個決定？」我個腦快速咁轉緊，諗緊有咩方法可以令呀詩回心轉意。
 
「可能會，但至少依家唔會。」呀詩依舊用佢迷人嘅笑容望住我。
 
一晃眼，我已經望咗呢個笑容好多年，未曾睇厭過，依然都係咁楚楚動人。
 
佢同中四嗰陣一樣，離別嘅時候，講嘅說話總係令我無言以對。