《我的MK妹同桌》第二季: 209

呀詩坐低之後，一樣無講嘢，我痴痴咁望住佢，一路幻想我哋慢慢經歷歲月嘅洗禮，跟住一齊老去。
 
呀詩開口講嘢，先將我從幻想拉返嚟。
 
「我明你嘅感受，同時都知你係為我好，想我好返，過到嚟都好努力咁想我開心返，我唔係無感受到⋯⋯你頭先話叫我返去香港，留係度咁唔開心，而且因為咁樣而搞到自己病埋，無咩緊要得過身體。」呀詩呆呆地望住前方，依家呢個視線好似望緊維港對面咁。
 
「但我真係唔想放棄。」呀詩忽然話風一轉，堅定咁講。
 
「我犧牲咗好多先至過到嚟，我儲咗好幾年前，完成咗我一路想完成嘅嘢，老實講，呢段時間無你嘅支持，我係做唔到，你俾我放心去追求自己想做嘅嘢，雖然你會因為我離開唔捨得，但呢啲都係因為你愛我，你著緊我。」
 




呀詩彎低腰，佢嘅秀髮因為地心引力而下垂，加上河岸嘅微風營造出一種飄逸感。
 
呀詩側一側個頭，望住我。
 
對住我笑。
 
我第一次，望住呀詩嘅笑容會感到傷感⋯⋯
 
「我頭先都爭扎咗好耐，一路以嚟對外國嘅憧憬，我終於都做到自己想做嘅嘢，但好多夢想嘅樣貌，當完成咗後就變得截然不同，發現咗唔同之後就又放棄？」
 




「呢個諗法已經存在係我腦海度好長一段時間，直到你嚟到，我更加覺得唔應該就咁放棄，MK啲講啊，『條路自己揀，仆街唔好喊。』」
 
我俾呀詩突如其來嘅引言逗笑：「又真係幾MK。」
 
「我想堅持埋落去，想睇下個結局，我知辛苦⋯⋯我一路以嚟都辛苦慣，唔差在呢段時間啦。」
 
跟住呀詩用佢冰冷嘅雙手摸我塊面，請我食「凍柑」。
 
凝望我雙眸，道：「但我唔想你咁辛苦。」