《我的MK妹同桌》第二季: 208

我哋嘅樣慢慢喺底片度浮現上嚟。
 
影咗兩張，一張俾我，一張係呀詩度。
 
好短暫，好多嘢想做，但嚟唔切做，而你又深知只有呢一次機會，因為價錢太貴，唔會再坐第二次。
 
唔想就咁結束嘅惆悵感⋯⋯係踏出摩天輪嗰一刻蔓延開來。
 
望一望個時間，已經6點幾，但個天仲未有暗落嚟嘅跡象。
 




「你仲有無咩地方想去啊？」我問呀詩，就算6點幾，我都唔想咁快完咗呢一日。
 
呀詩之後要忙功課嘅嘢，要趕進度，我亦都無可能咁自私要犧牲呀詩嚟陪我遊一轉英國。
 
所以想用盡個時間。
 
以前都有過呢種感覺⋯⋯越想珍惜、越想用力捉緊就越無力。
 
「無啊，可能係呢度一排，開始覺得唔太特別？」我同呀詩跟住人流離開。
 




然後就沿住河邊散步。
 
「我發覺我嚟到英國要去好多地方，先不枉大老遠洗咁多錢過嚟，但呢一刻我真係覺得唔需要去咁多地方，依家我諗唔到可以去邊，明明倫敦咁大，我咁多地方都未去過。」
 
好多遊客混雜著英國人係我哋身邊經過，有聽到熟悉嘅廣東話，更多嘅係講普通話，一眼就會認得出佢哋係邊度人。
 
「但我更加想係你身邊，呢個先係我過嚟呢度嘅目的。」
 
「我頭先有諗過，如果你係呢度心情真係咁鬱悶，仲係咁嚴重嘅話，不如同我一齊返去啦？學業嘅嘢咪由佢停住先囉，就算因為咁樣遲一年畢業，都無乜問題姐？最緊要你無事。」不知不覺我捉住呀詩嘅手慢慢變得用力。
 




「好無？」我柔聲問，「一齊返去啦？」
 
呀詩沉默，低著頭，將耳邊被風吹過嘅頭髮重新整理，然後隨意地潑向耳後。
 
露出半個側面嘅佢，被風輕撫過，更顯迷人。
 
呀詩係我面前，好似從來都無變過，但當某一刻，你腦海將第一次見面嘅佢重疊後，先察覺早已成長為另一個模樣。
 
青澀、稚氣、MK、間中粗魯、爆粗；成熟、穩重、有個性、有方向、有屬於自己嘅魅力。
 
我覺得呀詩好型。真㗎，真心覺得佢型。呢個字唔係淨係形容男仔，我覺得形容女仔都好貼切。
 
呀詩甩開我隻手，用我比快幾步嘅節奏向前行。
 
我突然有啲驚，呀詩要走？佢去邊？做咩事？下？喂？




 
點知原來只係行去前面嘅凳度坐低，張凳係兩棵樹中間，甚是寫意。
 
個畫面好似《秋天的童話》入面周潤發同鐘楚紅坐係公園度談心嘅畫面，西方國家嘅景象對於一直身處係亞洲嘅人嚟講，係夢幻嘅地方嚟。
 
我行過去坐係呀詩隔離。
 
此刻嘅光景，就係我一路想像，我同呀詩老咗嘅模樣。