《我的MK妹同桌》第二季: 202

終於！等到佢出到門口嗰陣，我餓到仆街。
 
我餓到只要求其食一餐，乜都好，填飽個肚就得嗰種。
 
但係呀詩好似唔識餓咁，整咁耐都未嗌過一句餓⋯⋯當然，我都唔敢嗌餓啦。
 
呀詩嘅精心打扮，著條性感嘅短裙仔，係我期待嘅嘢！
 
「我都好耐無咁樣打扮過，係呢度返學都唔需要點樣打扮，又唔需要去見啲咩人。」
 




「靚唔靚啊？」呀詩問我。
 
廢話，有得話唔靚㗎咩？從來呢個都係得一個答案嘅問題嚟。
 
「靚！」佢需要嘅係轉換一個心情。
 
快快手出街，已經係晏晝時段，係香港呢個時間可以食下午茶了。
 
「乜你唔餓咩？」我餓到腳仔軟。
 




「唔係好餓啊，我係呢邊好少食好多嘢，都慣咗。可能啲人唔啱自己食啦，同埋嚟到呢度之後都無乜胃口。」
 
「咁又係，你成個人都瘦咗唔少，本身已經瘦㗎啦，我見到都覺得心痛⋯⋯」
 
呢種瘦削其實好唔健康，我唔想見到呀詩咁⋯⋯估唔到呀詩嚟到呢度之後，無一個好嘅發展，反而個人嘅狀態越嚟越唔好，我諗呢一點我哋兩個都無預想過。
 
將好多嘢都諗得太美好，亦將外國嘅嘢諗得太美好。
 
唔係話外國嘅生活唔好，本質上係無問題，如果你本來係身為嗰個地方嘅人，但我哋外來人，要融入實在係一件好難嘅事。
 




「我都好掛住香港。」
 
「但仲有好耐先可以返去，我唔知捱唔捱到。」呀詩抱怨著，撓住我手臂，無力地捱落嚟。
——
「捱到嘅，無咩嘢捱唔過。」我哋就咁係英國嘅街頭漫步。
 
灰濛濛嘅天氣實在好難令人心情舒暢，不自覺就會覺得鬱悶。
 
「聽講呢度嘅天氣成日都陰陰沈沈，真係㗎？」我問呀詩
 
「係啊，好少見到好天氣，而且周不時都會有濛濛雨。」可能呀詩嘅心情都因為咁受影響。
 
「去食下好嘢，等心情開心返啲？」我只能夠用最溫柔嘅聲音同呀詩講，希望咁樣有用，可能令佢開心返啲。
 
唔知呢度有咩好食嘅我，即刻上網搵餐廳，無openrice嘅我最後搵咗兩間，唔知好唔好嘅，睇啲相都係西餐樣，好似間間都差唔多咁。




 
「我搵咗呢兩間，唔知好唔好食，你有無想食嘅餐廳？」
 
「無啊，求其得㗎啦。」我側身望望呀詩，佢表情仍然係鬱鬱寡歡。
 
去到食飯都係一樣，係我印象入面，咁樣嘅呀詩係好陌生。
 
以前就算屋企嘅事，經歷過呀彥，入U後讀書壓力大，都未曾見過呀詩咁樣。
 
佢唔係唔會唔開心，而係過一排，或者有時出嚟散下心，總會有一個時刻，佢係可以放低唔愉快嘅心情，開心起嚟，繼續發揮佢開朗活潑嘅本性，係我面前鳩下鳩下咁。
 
我亦都好多次，俾佢呢種時而戇鳩嘅性格感染。
 
依家呀詩俾我嘅感覺，係佢未必再咁樣嘅 moment，我理解到佢嗰種，連笑起上嚟都覺得勉強，都覺得攰，索性唔好笑，反而仲輕鬆。
 




「你無事啊嘛？」我關懷備至地再三問呀詩。
 
「我連呃自己重視嘅人嘅力氣都無，我唔想同你講我自己其實無事，我係有事，但我無力去改變啲咩，我亦都知道我咁樣會影響身邊嘅人，我就好似一個黑洞咁，會吸埋身邊嘅人落去個漩渦度。」佢望住個餐，個樣睇落無乜胃口，雙手拎住餐具，卻久久不動。
 
此刻我好想攬住對面嘅佢，之前因為long d做唔到嘅嘢，我依家可以做到，我想擁抱佢，俾啲力量佢，希望佢可以從中感受到溫暖，唔好俾自己一直咁無力。
 
「你唔洗驚會連累到我，我做嘅就係喺你身邊支持你，其實我同你都一樣咁無力。」
 
「不過我知依家我哋唔可以一齊拉入黑洞入面，至少其中一個要正面啲，咁樣先可以拯救到另一個。」呢個係我嘅諗法。
 
呀詩沈思咗一陣，轉頭望住街外嘅風景。
 
我哋坐係室內靠街嘅位置，側邊係一度門，敞開，出面仲有擺幾個位，有幾個外國人坐係出面，好寫意咁一邊食嘢一邊飲酒，無受天氣影響，有講有笑。
 
好撚chill。




 
最chill嘅都係對面公園嘅人。
 
呀詩嘅視線，停留係對面嘅公園。個公園唔大，但好多人坐係公園度，唔一定係野餐，有啲只不過係一條友坐係度睇書，無鋪野餐墊；有啲就一男一女係度拍拖。
 
呢一幕真係好似直接望穿部電影咁，如幻似真。
 
然後呀詩用憂鬱嘅眼神，吐出一句：「希望可以。」