《我的MK妹同桌》第二季: 203

「依家就連出嚟食個飯，我個腦都仲係諗住啲功課。」終於呀詩都起筷。
 
「其實搞唔掂咪搞唔掂囉，可能呢排成績唔係好掂，返去香港再追返囉，唔係好大件事，大到成日俾咁重壓力自己嘅。」我只好試圖用其他觀點嚟到說服呀詩唔好亂諗嘢，唔好咁多壓力。
 
「當你去到對住啲功課嘅時候，你就會好驚，驚做得唔好之後就點點點，同埋唔知班人想點，做得唔好俾佢哋話，捉到痛腳，最最最重要嘅一點係，我真係唔想衰俾佢哋睇，想證明俾佢哋睇，佢哋嘅做法同諗法都係錯嘅。」
 
「你明唔明啊？」呀詩嘅眼神，此刻係想有個人可以明白佢，理解佢，體諒佢。
 
而呢個人，佢想係我。
 




「明嘅呢樣，我都係想你唔好咁大壓力姐，我都盡咗力。」
 
然後我哋就默默咁食完餐飯，大家都係沉思嘅狀態，無玩手機，無睇外面嘅風景，真係純粹低頭食完餐飯。
 
我哋各自都唔知對方諗緊啲咩，呢一個狀態實在好陌生，亦係我一路以嚟都想像唔到嘅事，然後就咁樣發生咗。
 
其實唔知對方諗緊咩，明明大家都各自有心事，但係選擇自己一個人係心入面思考，甚至乎俾唔好嘅心情屈住係入面，唔打算講出嚟，俾對方了解。呢種心情好令人煩躁。
 
好想知，亦都好想問，但你知道再有下一步動作，對方只會唔耐煩同燥你底，你只好將所有嘢都吞曬落肚。
 




食完飯，我哋就去倫敦啲出名嘅景點行下，去睇大笨鐘，搭英國嘅地鐵，比我想像中落後，卻令人莫名感到鍾意。
 
之後再去倫敦塔橋、倫敦眼，我初頭以為咩嚟啦，知道係摩天輪，但佢叫倫敦眼，應該有啲特別嘢掛？
 
點知乜都無嘅，其實好普通，去到望一望搭一轉嘅價錢。
 
「哇⋯⋯屌你老母，咁撚貴嘅？」我同呀詩講，我真係好驚訝。
 
「哇，痴撚線，真係好撚貴唔係講笑，搭一轉都夠我去海洋公園啦，我去坐成日摩天輪唔好？」佢嘅反應令到我大笑咗。
 




之前嘅唔開心，一瞬間就掃走曬，呀詩真係有咁嘅能力㗎。
 
「得，係得你一個咁傻會坐成日咋嘛。」我見機會難得，梗係搵位入，串一串佢啦。
 
「痴線，就係咁傻啊，仲抵過係呢度坐一轉啊。」呀詩唔服氣。
 
呀詩的確係唔服輸嗰種典型嘅MK性格，隨時都可以起曬剛。佢亦都只有係最親嘅人面前，先會柔弱。
 
「你都係第一次嚟咩？」我有啲愕然咁問呀詩。
 
「係啊，我都話咗我都無乜點去其他地方囉，無人陪我嚟，我都淨係自己一個去過睇大笨鐘咋嘛。」呀詩講中間嗰幾句嘅時候加重咗個語氣，然後斜眼瞪住我。
 
好似我做錯咗咩事咁⋯⋯