《我的MK妹同桌》第二季: 201

執完啲行李，安頓好之後，我就同呀詩係間房度各自做自己嘢，我就無乜好做，都係玩下電話，打下機咁。
 
時間過得好慢，慢到我以為過咗好耐，實際只係唔夠半個鐘。
 
直到晏晝，呀詩行過嚟，扁住嘴咁講⋯⋯
 
「係咪出去啊？」呀詩彆扭地說。
 
個氣氛有啲怪異，捉摸唔透，同埋唔知幾時會爆發大家嘅情緒。
 




因為連我嘅情緒，都受到牽連。
 
「唔係話唔去咩？」我反問。
 
「依家去得啦。」呀詩並唔係熱情咁講，而係冷冰冰咁講。
 
我知道呀詩嘅情況嚴重，喺頭先呀詩去飲水嘅時候，我見到佢有食藥，佢嗰樽藥，係啲抗抑鬱藥嚟。
 
自從知呀詩可能有呢個病嘅時候，我都有搵啲相關資料，樽藥啲樣我都有印象。
 




食得多藥，會食到個人無乜感覺，壓抑住曬啲情緒。
 
呀詩無同我講過佢有食藥，佢呢啲事都係略略同我講過下，當我想問深一啲嘅時候，唔係扯去第二個話題，就係唔出聲，唔想講。
 
的確，有啲事，一路以嚟無問題，唔代表之後唔會有問題出嚟。
 
我同呀詩一早習慣咗坦誠相待，因為大家都唔鍾意有條刺係心入面。但係呢個情況，呀詩選擇唔同我分擔，獨自承受。
 
我可以想像到，佢自己一個去睇醫生，自己一個去買藥，自己一個照顧自己。
 




一諗到咁，就好似有個細刀片仔，全身一刀一刀慢慢割咁。
 
唔太痛，但係種好難受嘅折磨。
 
「好。」我都起身。
 
「咁去邊？」我問，微微一笑。
 
「你有咩地方想去啊？」
 
「無㗎，只要出去一齊行下，去邊都得⋯⋯不過，我哋都係食咗嘢先啦？」
 
「好啊。」此時嘅呀詩，一臉輕鬆寫意。
 
我都唔再將頭先嘅事放係心度。




 
呀詩換好衫，化埋妝，都搞咗一輪。見到佢精心打扮嘅樣，知佢重視呢次約會，有陣時男仔等，係值得㗎，你都想另一半靚，然後重視自己㗎？
 
好耐無咁樣嘅感覺，為咗保持呢份驚喜感，我專登無去睇呀詩，坐遠啲，自己玩手機。