《我的MK妹同桌》第二季: 192

屋企唔算大，老媽都好接受我哋兩個瞓同一間房，估唔到佢都幾開通，我都做好瞓廳嘅心理準備。
 
呀詩入去擺低啲日常嘢，我係個廳幫佢整理下個喼。
 
執執下發覺唔對路⋯⋯好似有啲嘢漏咗？但係一時之間又醒唔起係咩事。
 
係咩呢？好似係啲好緊要嘅事嚟。
 
然後沿住條線慢慢思索，終於知係咩事啦！
 




我即刻衝入房，當我記起嘅時候。可惜啊⋯⋯一切已經太遲，mo la mo la⋯⋯
 
呀詩已經係度睇緊我打算送俾佢嘅禮物。
 
「咁無禮貌㗎你，一入嚟就睇人哋啲嘢。」我已經阻止唔到事件嘅發生了。
 
「你擺曬係度，好難睇唔到喎。」呀詩溫柔地掀開啲相。
 
呢個係最近流行嘅爆炸盒，好多人都po呢種盒嚟曬命。有陣時我都想俾到呢啲嘢呀詩，我諗女仔收到點都會鍾意，盡可能做到嘅，咪做囉，只要佢開心。
 




你問我，身為男人唔會鍾意呢啲咁麻煩嘅嘢，只有為自己在意嘅人開心，先心甘情願去做。
 
「依家無曬驚喜啦。」我無奈地說。
 
「唔會啊⋯⋯依家都好有驚喜啊。」呀詩溫柔咁同我講，「見到嗰下就係驚喜嚟㗎啦。」
 
呀詩行埋嚟，攬住我。
 
今日嘅佢，格外溫柔。
 




「依家搞到我更加唔想去exchange，你話點算？」呀詩嬌柔咁係我耳仔邊講。
 
因為佢咁柔情似水，連帶我都放軟埋。
 
「點解嘅？」
 
「唔捨得你⋯⋯」佢攬得更實。
 
呀詩咁樣講一講，佢就快要離開我一段時日嘅真實感更加強烈。之前都未咁覺，佢都仲未要走，而且自己會說服自己：好快就會返，唔係好耐姐。
 
然後突然俾呀詩一講，接住落嚟嘅一個月、兩個月、三個月都會見唔到佢。
 
我以為自己會慣，會OK的。
 
有陣時，會高估自己嘅堅強，卻輕易被小事觸動。




 
「我都好唔捨得你。」我回應佢。