《我的MK妹同桌》第二季: 191

係的士度，我已經打電話返屋企，將呢件事話俾我老媽知，咁我就無將呀詩同佢爸爸啲嘢話俾老媽子知，始終呢啲家事都係由呀詩親自講好啲。
 
呀詩係的士度捱落我膊頭度，咩都無講，就咁捱落嚟。
 
我輕拍呀詩手背，就咁坐到返我屋企。
 
「哇⋯⋯入嚟先入嚟先，搞邊科啊？你哋淨係著住睡衣過嚟？」老媽一開門見到我哋兩個咁樣，嚇親。
 
雖然呢個家唔太特別，唔係好有錢，老母平時又好撚煩，但係呢啲時候，先真實咁樣感受到屋企嗰陣溫暖。
 




呢樣嘢先最重要，咁樣先叫做一個家。
 
我帶住呀詩入去，老媽就好緊張咁係度左講右講，無停過口。
 
「要唔要水啊？」
「飲唔飲嘢啊？」
「口唔口乾啊？」
「隨便坐住先啦。」
「啲嘢擺呢度等㗎啦。」
 




「得啦媽，我哋搞得掂嘅，你唔洗擔心咁多啦，我幫呀詩執一執啲嘢先啦。」我邊行邊抬住呀詩啲行李，你都咪話唔重啊。
 
「唔該姨姨，唔洗咁客氣啦，我咁樣突然嚟打擾你哋都唔好意思，唔洗招呼我啦，我OK㗎。」呀詩客氣咁講，但所有嘅情緒都寫曬係臉上面。
 
老媽子挑通眼眉，點會唔知啊？
 
「好啦，你哋整理下先，我執下入面間房先。」
 
我見老媽行開咗，我就行過去諗住安慰呀詩。
 




「你無嘢啊嘛？」
 
我一講完，呀詩就放軟曬手腳捱埋嚟，呀詩嘅身體本來就好柔軟，好似水造咁，一路以嚟我都咁覺得。
 
「好似終於鬆一口氣咁。」呀詩背住我，捱係我膊頭度。
 
「點解可以咁大分別？」
 
「你屋企人真係好好。」明明一朝早嗰陣，我哋都仲好溫馨，但係發生完呢啲事，好似搾乾曬成個人啲精力咁。
 
 
「你背後，唔係無嘢依靠。」
 
 
「呀仔⋯⋯執好曬入面啦⋯⋯」老媽突然殺入嚟，專破壞氣氛。




 
不過我哋咁老夫老妻，唔會覺得牙癢癢，日後呢啲溫馨甜蜜嘅氣氛大把啦，所以就算被破壞，都唔特別覺得可惜。
 
「得啦！」係無乜心情想應佢咁解姐。