《我的MK妹同桌》第二季: 193

最近成日都感受到時間流逝得好快，眨下間我哋已經year3，仲有一年我哋就畢業，而year3⋯⋯已經過咗一半，我仲好努力咁追緊啲成績，上到嚟真係讀得辛苦咗，多功課、多present。
 
呀詩下半年又要去exchange，返到嚟可能已經year4開學，到時候大家又忙要出嚟社會嘅嘢，諗要做咩啦，搵啲咩工好，執cv。
 
日常嘅瑣碎事越嚟越多，越嚟越煩心。
 
「係我面前做埋份禮物係咩感受啊？」呀詩潤鳩我。
 
「我為咗邊個啊？我咪又係為咗你。」
 




「嗯⋯⋯幾好！望住你係我面前一步步咁做埋份禮物佢，幾開心嘅！」
 
呢幾日，佢就係度執自己啲嘢，我除咗陪佢執，得閒仲要做下功課，整埋剩底嘅禮物。
 
裡面就係我呢段時間同呀詩去唔同地方，影到嘅相。
 
「死啦，好多嘢我都未帶到出嚟添。」呀詩蹲係個喼前面，苦惱著。
 
「係咪啲日常必需品啊？去到再買都得姐。」我安慰佢。
 




「去到買貴啊⋯⋯而且嗰啲係我一路用開嘅牌子嚟。」佢扁嘴。
 
呀詩扁嘴個樣好鬼可愛，每次只要佢擺出呢個樣，我就會心都軟埋，耳仔都會軟埋，佢想要咩，想點就聽佢話啦。
 
但係我唔會話俾呀詩知，如果唔係佢次次都用呢招仲得了？
 
「我同你出去買過啦，反正仲有一兩日時間⋯⋯我都想陪你多啲。」
 
「唔要！」呀詩斬釘截鐵咁拒絕我。
——




「下？點解？」我唔明。
 
「唔想麻煩你咁多，我自己解決到㗎，你已經幫咗我好多，我發覺自己某程度上越嚟越依賴你，唔知由幾時開始。」
 
「咁樣唔好咩？我哋以後咁多日子要過，我做唔到可以俾你依靠嘅男人嘅話，仲得了嘅？」我自信地道。
 
「強b，你比起以前，真係成熟咗唔少，第一次感覺到你大個咗好多，以前嘅你仲好青澀，仲俾我笑你青頭仔，依家已經俾到人安心嘅感覺。」
 
聽到呀詩咁講，我心入面真係暗爽得好緊要！！！認真㗎！無乜嘢俾呢個讚笑更值得開心了！
 
但係我無呀詩講得咁偉大，我只不過係做咗男人應該要做嘅嘢，係呀詩需要我，同埋無助嗰陣企出嚟，就算要扮，都要扮到出嚟，唔好穿煲。
 
久而久之，習慣咗出嚟撐住，就會成長。
 
「一路以嚟你都咁支持我，我都開始怕去到嗰陣無你係隔離會好唔慣，原來臨出發前，要離開一段長時間，先會察覺到邊啲人對自己嚟講係重要。」




 
「係我心目中，唔係子晴，唔係屋企人，淨係得你。」
 
呀詩係我懷抱入面講，佢直頭趴係我心口，有種錯覺係⋯⋯佢係直接講入心。
 
「傻豬嚟嘅，見到去我都會陪住你㗎嘛，我哋可以face time，可以skype，你唔會見唔到我㗎喎。」
 
我心入面都有啲怕，就算我做齊呢啲嘢，都未必安撫到呀詩嘅情緒，呢排有陣時佢都會情緒底落。
 
我都不禁係度諗，去exchange係咪一件好事呢？對呀詩嚟講。我都唔知。
 
「你會唔會瞞住我出去搵第二個㗎？」呀詩用啲bb語氣問我。
 
「下？係都驚你出去搵洋腸先啦。」我哭笑不得。
 




「答我啊！」呀詩打我心口，然後移動自己身體，直接瞓落我大脾，而我就坐係床邊。