《我的MK妹同桌》第二季: 186

對於子晴嘅做法，無乜好質疑，依家反而覺得蕃薯仔應該似返個男人。
 
過幾日，蕃薯仔應承咗我，話嚟同呀詩食餐飯。
 
我即刻同返呀詩講，於是好快就揀好曬餐廳，都廢事拖。
 
咁嗰日蕃薯仔話遲嚟，我哋三個已經到咗，我哋就入去拎咗位先。
 
「唔知蕃薯仔一陣嚟到點呢？」我同呀詩講。
 




「屌你啦，子晴係度㗎。」呀詩屌我戇鳩鳩咁。
 
「所以我先同你講咋嘛。」查實係因為我好想知，同埋想打定個心理準備俾所有人姐。
 
「我無乜嘢喎，我想我哋好似以前咁，可以咩都講，唔洗就住就住。」子晴嘅大方，更顯得蕃薯仔之前唔似一個男人。
 
但係可能真係如啲人話，飛人嗰個傷害無咁深，而被人飛嗰個先難放低。
 
始終要被人飛嗰個從深深嘅感情中抽離出嚟，真係唔容易；而提分手嗰個，一早已經有呢個諗法。
 




「嗨！」係我哋睇緊有咩食嘅時候，蕃薯仔啱啱好到。
 
我同呀詩坐埋一齊，而對面，淨係得返子晴同埋蕃薯仔嘅位置。
 
呢間餐廳，係我哋中學時代每逢啲大節日就會嚟食嘅放題。

蕃薯仔一嚟到，無好似我哋諗咁樣，咁拘謹，反而好fd咁同我哋傾偈。
 
「你哋嗌咗嘢食未？」蕃薯仔唔係同我哋兩個講，而係同子晴講。
 




我同呀詩都打咗個凸，估唔到蕃薯仔一嚟就咁，有啲超乎我哋想像。
 
「未啊，我哋都係啱啱咋。」子晴都無特別覺得驚訝，好自然咁同蕃薯仔對答。
 
「嗌咗三文魚未？我要多啲三文魚。」蕃薯仔又好似去返以前咁，但我睇唔出佢係真心啊，定還是扮嘢。
 
「我哋有嗌啊，呢啲嚟放題必嗌㗎嘛！」呀詩同蕃薯仔講。
 
「咁幫我嗌個雞軟骨啊，係炸物嗰度。」蕃薯仔同我講，因為我依家做緊負責劃單嗰個⋯⋯俾人推咗出嚟做。
 
「一百蚊。」我伸手問呀詩攞。
 
「超！俾你咪俾你囉。」呀詩好唔忿氣咁講。
 
「做咩啊？」子晴同蕃薯仔異口同聲咁講，令本來唔尷尬嘅氣氛，忽然變得尷尬⋯⋯




 
兩個人即刻互望住對方，唔講嘢。
 
我心諗，你哋兩個有無咁同步啊？果然一齊過，係有啲默契。
 
「我哋頭先呢，就輸賭你哋會唔會有嘢，呀詩就話一定好老尷，我就話未必嘅。」我用講笑嘅口吻。
 
「我無啦依家，都過咗去。」曾經沉重嘅事，都會有變輕嘅一日。
 
「我知你哋係一班好好嘅朋友，我已經無咗段好好嘅感情，我唔想連你哋都無埋。」蕃薯仔咁樣講一講，肉麻到我都唔知點接好，但的確係感動嘅。
 
「咁呢一百蚊值得俾啦，係咪？」我潤下呀詩。
 
呀詩當住佢哋面又上演暴力場面。
 




雖然痛嘅係我，但至少舒緩到尷尬嘅氣氛。
 
然之後，我哋嘅話題就唔再講蕃薯仔度，直覺話我知，如果問得越深入，蕃薯仔只會越唔知點好，到時盞更加尷尬。
 
「你幾時飛啊？」子晴問得好好，同時亦係呢餐飯嘅重點。
 
呀詩答咗個日子，係兩個星期後。

「哇，都幾快喎！」佢兩個都咁樣認為。
 
「姐係成大半年都見唔到你囉？」子晴露出不捨嘅眼神，我諗閨蜜就係咁？
 
「係㗎都⋯⋯大半年無人陪你行下街，去食下tea㗎啦。」
 
面對離別，我哋總係會用呢種半開玩笑嘅方式，去遮掩自己內心嘅不捨。




 
因為唔想係呢個場合，充滿住傷感。
 
「我唔制！」子晴任性咁講。
 
我係隔離睇，其實知佢哋兩個感情真係好好嘅，一路以嚟。原本係應該兩個大纜都扯唔埋嘅人嚟嘅。
 
一個乖乖讀書派，一個就成日出去蒲嘅MK妹，就連打扮都完全唔同嘅兩個人，好難想像佢哋會好似依家咁，fd過打band。
 
「得啦，知你哋女人之間嘅友誼係要咁誇張㗎啦。」蕃薯仔加把嘴埋嚟⋯⋯
 
好快，我哋又好似以前咁嘈嘈閉。
 
「你識乜啊，我同呀詩情比金堅！」子晴反駁返蕃薯仔，佢哋嘅隔閡無曬，所以有陣時真係好睇人嘅心態。
 




我唔知蕃薯仔佢係放低咗未啦，呢樣嘢得佢自己心知，但係至少我覺得蕃薯仔係用啱態度嚟處理呢件事。
 
「似你哋男人，咩都收收埋埋唔講就以為好型咩！覺得咩都自己揹返飛先係真男人啦喎？」呀詩都幫住子晴，無啦啦就變咗男人同女人之間嘅鬥爭。
 
一輪打鬧之後，我哋都笑自己膠，講埋曬啲膠嘢。
 
「係喎，咁你兩個諗住點啊？之後long d啦喎。」子晴問我哋。
 
我靜默咗落嚟，因為我想聽呀詩答，想知呀詩會點樣答呢條問題。