《我的MK妹同桌》第二季: 187

其實我係專登唔出聲，睇呀詩發表。
 
「我覺得我哋無乜嘢啊，咁多年囉，long d唔難嘅！有時我哋忙起上嚟，都好似long d咁㗎啦。」
 
忽然間，我放係枱底嘅手感覺到一陣冰冷嘅觸感，然後又有一股暖意漸漸散開嚟。
 
好快就反應到係呀詩隻手，然後佢慢慢反轉我隻手，係枱台下面伸開我每一隻手指，然後用佢嘅手指梅花間竹咁扣落去。
 
佢呢一下嘅十指緊扣已經表明咗好多嘢。每一次，係呢啲場合，呀詩都好似會察覺到我嘅不安，然後用佢冰冷嘅手，溫暖我哋兩個。
 




呀詩呢句說話，彷如打咗隻強心針咁。
 
我都信我哋會克服到嘅，唔係啲咩好大件事姐，我對呀詩有呢個信心。
 
「係咪啊？」蕃薯仔唔係好信。
 
「梗係啦，我哋咁多難關都過到喎！」
 
「好啦，希望呀詩去到外國都順順利利啦！」
 




「嚟！我哋飲杯先！」我哋一齊舉起罐汽水，都半個大人，但我哋仲做緊啲中學生嘅嘢。
 
「你去到外國有鬼仔嘅話，記得試一試啊，人生物一世，哈哈哈哈！」子晴同呀詩笑說。
 
「喂喂喂！你咪教壞人先得，外國嘢容乜易食壞肚㗎？」我要捍衛返男人嘅地位。
 
「有靚仔鬼佬可以介紹埋俾我。」子晴講笑咁講。
 
「你唔係有男朋友啦咩？」我記得子晴依家有男朋友，仲諗住食洋腸？？
 




「講笑姐，最緊要呀詩去到識下鬼佬嘛～～」
 
我哋傾得興起嘅時候，蕃薯仔係隔離飲緊嘢，皮笑肉不笑咁，唔知可以點樣反應。
 
我見到佢嘅表情就知⋯⋯碌柒啦。
 
我覺得蕃薯仔係知子晴已經有另一半，但當下親耳聽到嘅衝擊確實係大嘅，唔知俾咩反應先好。
 
當佢表情出現不知所措嘅嗰一刻，我估佢自己心入面都知，其實佢都仲著緊子晴。
 
嗰種曾經重要嘅位置，已經有人填滿嘅感覺，一比較落去，自己已經變成無咁重要嗰一個。
 
除咗呃自己，我唔知有咩更加好嘅方法可以令自己個心好過啲⋯⋯