《我的MK妹同桌》第二季: 185

「你係先好！最好一日三餐都影俾我睇啦！」我帶點興奮嘅口吻。
 
唔理佢係咪安慰我，但我聽落已經無咁不安，我更多嘅係唔放心佢自己一個人係嗰邊，唔知佢係嗰度會唔會搞得掂，唔知佢自己一個照唔照顧到自己，唔知佢係嗰邊會唔會俾人恰。
 
如果⋯⋯
 
如果我都係嗰度嘅話，就唔會搞唔掂。
 
因為我一定會照顧好佢，呢幾年嚟，我都係咁做。
 




我見住呀詩準備嘅嘢越嚟越滿，就姐係話，佢差唔多起行。
 
臨別秋波，實會約埋班朋友食飯，當係送佢咁。
 
但好撚怪⋯⋯係好到喉唔到肺，因為只係去半年，你話人哋去成4年就話好依依不捨姐，而呀詩其實好快就返嚟。
 
所以真係食個飯，聚下舊，聽講好似無特別送啲咩。
 
佢有同佢班熟嘅大學同學食飯，然後都有約子晴同蕃薯仔⋯⋯
 




當初話要約嘅時候啊，我淨係諗，一定尷尬死！
 
我哋明明以前好fd，做乜事依家要輪落到咁？約出嚟都驚面阻阻咁。
 
長大真係好撚煩⋯⋯
 
「真係約？」我問呀詩，「我覺得蕃薯仔未必會嚟喎，唔知佢放低子晴未姐。」
 
「都隔咗咁耐啦，無咩好放唔低掛？」呀詩係電話度講，嗰個語氣都唔肯定蕃薯仔係咪放低咗。
 




「好難講得埋㗎，你都睇到佢上次咩樣㗎啦？」
 
「你都啱⋯⋯」呀詩好無奈咁講，唔單止佢無奈啊，我都覺得好無奈啊。
 
「咁點好啊？約定唔約好啊？我怕無乜時間，而且佢哋又未必得閒呢？」
 
「大個咗真係好難約出嚟⋯⋯」我都好明啊，好似身邊嘅人會一個個咁疏遠咁，一路陪伴住嘅，得返呀詩一個。

「照約囉！佢哋唔出嚟再算啦。」呀詩終於落定案。
 
「好，咁我約蕃薯仔，你約子晴啦。」
 
我哋即刻拎部電話出嚟whatsapp約佢哋，預咗佢哋唔會即刻覆㗎啦，所以最後我哋各自返屋企，佢哋先覆我哋。
 
子晴好爽快就應承咗我哋，但態度冷淡；而蕃薯仔就話佢要諗下先。




 
「都話㗎啦。」我咁樣係電話入面同呀詩講。
 
「估唔到對蕃薯仔咁大影響喎。」呀詩以為過咗大半年，蕃薯仔都應該放得低姐。
 
「可能佢要再多啲時間啦。」我無奈地說。
 
「但我覺得佢都係時候要死心⋯⋯」呀詩無啦啦咁樣講。
 
「下？點解無啦啦咁講嘅？」我奇怪點解呀詩咁講。
 
 
 
「因為子晴都已經有男朋友。」
 




 
 
「哇！咁爆？」我都估唔到添⋯⋯
 
不過都係嘅，佢哋都已經係過去式，我哋其實都需要向前行，而唔係想拎返過去嘅嘢。
 
我覺得子晴已經對上一段感情負咗佢應該有嘅責任，亦都足夠。
 
「佢同你講㗎？」我問呀詩。
 
「佢whatsapp同我講話，佢係ok嘅，不過都要問下男朋友先，佢咁樣講，就知佢已經有男朋友啦。」
 
「哦⋯⋯明曬，哇！咁佢都幾尊重佢男朋友喎。」我坦言。
 
「其實子晴真係好女仔嚟。」我知呀詩仲想講啲嘢，我略略估到，但呀詩無再講落去。




 
對於蕃薯仔嚟講，幾唏噓。