《我的MK妹同桌》第二季: 184

「我知⋯⋯我都明嘅，所以我都係呻下姐。就算我幾想，都知自己唔好再衝動，可能真係慢慢大個呢，識得排個優先次序，同埋知道後果可能牽連有幾大。」
 
「以前啲人講咩咩咩後果，講到咩後果幾嚴重咁，其實後果真係唔會好似想像中咁嚴重，天塌落嚟咁，只不過一步步，牽涉嘅係後面嗰幾步棋，然後就要用半年為單位咁去行。」
 
「慢慢堆埋堆埋條數，就好幾年過去。」
 
我嘆一口氣。
 
想像同呀詩係嗰邊嘅日子，很美好，我諗，我哋會因為咁而更加愛對方，一諗到咁，我就有好多動力同埋衝勁。
 




「我知如果真係衝動同你去咗exchange，我要追返啲分就唔係咁容易，我知你計過條數，就算返嚟都唔會defer，但我啱啱入返U，照咁樣睇，我係會defer，到時候我哋嘅感情唔知會點。」
 
「而且呢樣嘢唔係我計劃入面，但你有。一時三刻要改變自己嘅計劃，唔係咁易⋯⋯都需要諗過，不過都無咁嘅時間俾我，只好咁樣囉。」
 
「得啦，我知你依家識諗啦！」呀詩聽完後，鼓起笑容，搣我塊面。
 
「我都知你會唔捨得我，我係嗰邊都會掛住你嘅，但你識諗就好⋯⋯」
 
「因為係呢件事上面，我哋都做唔到啲咩。」
 




「可以做嘅，就係臨去之前，多啲留係對方身邊。同埋去見一見重要嘅朋友，因為會好耐唔見。」
 
飯後，呀詩拎住部手機影相，影snapchat。
 
呢排，好多人都係度玩snapchat，係度儲火，總之就分享自己身邊嘅嘢，乜鳩都影一餐，然後乜鳩嘢人都send，然後人哋又會send俾你，唔可以有一日斷，一日就有一個火，慢慢咁樣儲。
 
但每次開app，啲嘢就會唔見，所以有人話係偷食app嚟，自動刪走曬啲記錄。
 
呀詩亦都不例外，佢都有儲⋯⋯
 




「嗱！到時候你都用snapchat，去到就每日都share下身邊嘅嘢，儲下火，儲幾百個，我就返嚟㗎啦！」呀詩咁樣同我講，唔知係安慰我定咩呢⋯⋯？