《我的MK妹同桌》第二季: 183

距離呀詩準備去exchange嘅時間越近，呀詩已經準備緊自己要帶啲咩過去啦，睇得出佢係興奮嘅。
 
的確，可以去其他地方住下，去見識下，有別於一般旅行，佢係嗰邊可以有多啲時間感受下異國風情，已經足以興奮。
 
儘管我一早同自己講，要理性啲，不過係去半年姐，暑假嘅時候佢就會返嚟，我哋都成日見啦，無乜問題嘅。
 
理性嘅我係咁樣諗無錯，但當靜落心神，重新再諗起呢件事，感性上話俾我知，我唔捨得呀詩走。
 
於是乎，我係夜晚就趁我思念爆炸，將所有嘅情感⋯⋯
 




用嚟整禮物。
 
一張張相，整係張卡紙度，然後寫嘢落去，寫我嘅叮嚀，寫我嘅感受，寫我哋嘅回憶。
 
雖然⋯⋯雖然⋯真係好撚MK，以前係啲MK仔做埋曬啲咩爆炸盒啊，用嚟溝女，每逢唔知邊個邊個生日，就一定有呢啲爆炸盒，或者叫做驚喜盒嘅嘢出面係各大社交媒體上面。
 
估唔到依家我都做緊呢味嘢⋯⋯原來又唔係想像中咁差㗎喎，哈哈哈哈！
 
我已經預視到呀詩收到份禮物係咩表情，實感動到爆。
 




不過我諗住留到最後佢上機前先送俾佢，而呢份禮物係未完成嘅，我會將每一個重要嘅時刻都放埋入去。
 
差唔多聖誕，聖誕左右就係我哋完sem嘅時候，意味住差唔多開sem嗰陣，呀詩就要去英國exchange。
 
我心情好撚忐忑，成日15、16咁，都咪話唔煎熬，又唔想講太多傷心嘅嘢，又唔係一去就去四年，只不過半年左右姐，但反而屈住唔講，個心仲更加唔好受。
 
最後就連普通散下步，都帶點傷感。
 
「點啊，你啲嘢準備好曬未？」我哋行完尖沙咀，就提議話不如坐船過港島，我哋就咁去坐船了。
 




係船上面，我望住維港兩岸嘅景色，咁樣問佢。
 
「你好想我走啊？」古靈精怪嘅佢，最鍾意就係人哋認真問佢嘢嘅時候，係度派膠。

我攬住呀詩，用力咁攬實佢，我哋一齊咗都幾多年下，原來我打從心底係好愛呀詩，經歷過咁多嘢，個感覺都可以仲係咁強烈。
 
我都唔知點解釋，當下最直接俾我嘅反應就係咁。
 
「點會想你走喎！」我攬住佢，係佢耳邊講。
 
「喂喂喂，做咩攬咁實姐，你真係呢⋯⋯喂啊⋯⋯唞唔到氣啦⋯⋯」
 
「呼⋯⋯呼⋯呼⋯⋯呼⋯⋯」
 
然後呀詩又一拳打埋嚟，而我沾沾自喜嘅樣搞到佢生蝦咁跳。




 
「你想整死我啊？」呀詩隻手仍然仲攬住我。
 
「係咪整死我，等我走唔到啊？」
 
「我真係唔捨得你啊嘛⋯⋯」我頭先帶住呀詩嚟到無乜人嘅地方，而且呢邊個景可以望到銅鑼灣到灣仔一帶，呢度嘅夜景真係好靚⋯⋯
 
「我都係⋯⋯」我估唔到呀詩會咁樣回我，我以為佢會安慰我話：半年姐，好快就會返嚟之類。
 
「你都唔捨得我咩？」我問返佢，但心入面暗暗竊喜。
 
「點解唔會啊？你係我男朋友嚟，我梗係會唔捨得你啦，你都唔知我幾想你都同我一齊嚟exchange，我哋可以去新嘅地方，嘗試新嘅嘢，不知幾開心。」呀詩係我懷抱度，訴說出佢嘅幻想。
 
「點解你唔同我講喎，你又唔叫⋯⋯」如果佢有咁嘅心意嘅話，我一定唔會理咁多，搏老命都同佢一齊去。
 




「你啱啱先入U，仲有好多嘢要適應，如果你就咁決定話要同我去嘅話，我驚你會defer咋，所以我唔想影響到你。而且我見你對exchange都無乜特別意欲，我就無同你提過。」