《我的MK妹同桌》第二季: 182

我哋忽然好似都有共識咁，無夾過，但明顯地，出嚟嘅次數多咗，以前大家都會忙課業，忙功課，就少咗出嚟。
 
可能漸漸課業無咁重，而且識得安排啲堂，安排啲時間。
 
唔會再好似之前咁chur堂，甚至乎無得揀咁焗住要上天地堂，依家我哋兩個啲上堂時間都排曬係禮拜二、三、四上，然後禮拜五一路放到禮拜一，真係多咗好多時間，而且啲堂都會排曬係中午前後嗰啲時間，絕對唔會早起身去上堂，如非必要。
 
就連返part time都好，都會隔住返，要chur就chur係暑假度，閒日就返少少咁樣。
 
咁樣我哋兩個啲時間就多返出嚟，會周圍去行玩，玩下，影下相咁。
 




Part time賺返嚟嘅錢，好多都洗曬係度，仲有啲係買嘢嘅呢？
 
呀詩都洗唔少錢係佢自己打扮上面，中學嗰陣幾何話要去行化妝品？去睇呢睇路㗎？
 
依家周不時行過，都會話入去睇下⋯⋯睇唔啱就話避過一劫姐，睇啱嘅話，就係落重本㗎啦。
 
淨係唇膏都好似買咗幾隻一樣㗎啦⋯⋯
 
「又買？你上次已經買咗支一模一樣啦喎？」我真係諗極都諗唔明。
 




「咩一樣啊？你色盲㗎？同上次嗰隻都唔同色。」呀詩即刻係佢個界波袋度拎咗上次支唇膏出嚟，係我面前show出嚟。
 
「咪一樣囉，有咩分別啊？」
 
「所以話，你哋啲男仔唔會明女仔要買嘅嘢有幾多，我夠唔明你哋玩嘅game，買嘅模型有咩分別囉！咪一撚樣？」
 
「點同呢？模型一睇就知啦個分別。」我即刻駁嘴。
 
「咁唇膏夠係囉，你睇唔出姐！呢隻係3號色，我依家睇緊呢隻係7號，你話係咪一樣啊？」呀詩大條道理串返我。
 




呢啲就係變成我哋兩個行街嘅日常，同啱啱一齊嘅兩小無猜已經好唔一樣，但亦都習慣咗。
 
依家處於一種狀態，要有美好嘅回憶，就必須要由自己創造。如果懶，然後又咩都唔做，只會白白咁過。
 
所以一得閒，我哋就會出嚟拍拖，漸漸地，身邊嘅朋友都少約，淨係靠啲app嚟維繫。
 
屋企嘅即影即有，唔經唔覺都儲埋好多，我都買咗兩底相紙了。
 
轉眼秋天，陪呀詩去買衫，佢話想換過以前中學啲MK衫，同埋想買啲新衫遲下去exchange用，但話無乜錢了，為咗去exchange，所以盡量揀啲又平又靚嘅。
 
旺中呢啲地方就啱曬啦，我又唔明啦，旺中啲衫出名MK，呀詩又話想換過曬啲MK衫，但又去行最多MK衫嘅地方⋯⋯
 
？？？？
 
做乜鳩呢⋯⋯