《我的MK妹同桌》第二季: 180

「話俾你知咪唔靈囉，邊有人問人生日願望係咩㗎？」呀詩好不滿咁講。
 
「個願望咁巴閉咩？講下就唔靈㗎啦？」我摸摸呀詩個頭，佢有時好鬼死得意，就好似依家咁。
 
「係！就係咁巴閉！」呀詩死都唔講佢個願望。
 
佢許願嗰陣，係笑住嚟許願，咁睇嚟佢都開心咁，起碼佢係笑到含曬春咁樣。
 
我哋就咁坐係個乒乓波枱度食，依家啲𡃁仔啊，無乜人打乒乓波㗎啦，以前呢個場滿曬人㗎，好多無乜嘢做嘅細路會係度玩。
 




我都有落過去樓下打乒乓波，細細個放學，睇完電視，而未開始識玩online game嗰陣，就係落街搵朋友玩，打乒乓波，玩樓下啲遊樂場，係玩到成堆老母落嚟捉我啲fd返屋企食飯㗎。
 
依家仲點會見到呢啲𡃁仔。
 
坐係乒乓枱度食，望住個蛋糕大大個，食唔曬喎。呀詩就用好熟悉嘅眼神望住我，然後睥住我。
 
Ok，fine！
 
今年佢生日就咁平平無奇咁過，但係生日入面應該要有嘅，我都有俾到。
 




「我仲有份嘢要送俾你。」我先係自己背囊度拎出嚟。
 
係佢想要好耐嘅港女袋，牌子嘢嚟，係希望佢遲下exchange嗰陣會用得著，然後知呢個袋係佢嘅生日禮物，係我送俾佢嘅！
 
「哇！我仲以為今年會無禮物收添。」呀詩雙眼發光，佢嘅表情同一舉一動都證明咗佢係鍾意呢個袋，同埋佢係估唔到，嘻嘻！
 
「點解你會咁諗呢？」我反問。
 
「咁原本諗住細搞㗎嘛，我諗住一齊整蛋糕已經係我哋嘅生日禮物嚟添。」呀詩滿足地說。
 




「咁送多份禮物，都唔係好多姐？」我滿意地笑。
 
「同埋你點知我想要呢個袋㗎？」女仔果然係女仔，係鍾意袋。