《我的MK妹同桌》第二季: 178

我哋依家嘅活動已經減少咗刺激嘅成份，以前會追求嗰啲可能令自己心跳加速，同埋腎上腺素飆升嘅活動，例如好似啲機動遊戲咁，咁就最正啦。
 
但依家已經唔同，多咗啲靜態活動；以前鍾意熱鬧，然後慢慢覺得悶，無必要，個次數就減少。
 
講咁多廢話，最後想講嘅，其實係我同呀詩都好enjoy佢嘅生日。
 
我已經覺得唔需要做太多嘅刺激嘢去證明我有幾愛呀詩，我只需要用細水長流去印證我哋段感情就可以了。
 
「小心啲！唔好太多，太多唔好睇㗎！我一陣仲要影相㗎！」呀詩仲緊張過我，因為佢睇實曬，搞到我手都震撚埋。
 




「你又打卡啊？」我笑問。
 
「咁我要俾其他人知我男朋友有幾好啊嘛！」屌啊⋯⋯佢又幾識講嘢喎，呢句直入我心，即刻成個人甜曬。
 
「哎啊哎啊！幾識講嘢喎。」我控制唔到自己個嘴啦，係度笑到停唔到。
 
「知我勁啊呢？」佢得戚，然後我唔小心，擠得多得濟添⋯⋯
 
「喂啊！！！呢頭讚完你，呢頭就搞啲咁嘅嘢，你話你係咪唔讚得㗎？」
 




然後又係度打打鬧鬧，我哋無一刻會停，又嘈又笑咁，至少我哋兩個一齊，唔會無聊。
 
間鋪播住我哋熟悉嘅歌，以往嘅經典，個嘴自動識跟住唱。
 
怎麼了 你累了 說好的幸福呢
我懂了 不說了 愛淡了 夢遠了
 
其實佢唔係淨係播呢首，只不過係入面其中一首，然後又有我同呀詩嘅回憶，呢種巧合間唔中會如幸福咁降臨係每一個人身上。
 
聽住首歌，更加有動力整蛋糕。




 
我同呀詩都係度哼住呢首熟悉嘅歌。
 
「依家仲有無聽周杰倫啲歌？」我唱住周杰倫嘅歌問佢。
 
「有啊，不過少聽咗嘅，同埋都會聽佢啲新歌。」
 
「我記得呢首係我第一首聽周杰倫嘅歌，而且仲要係你俾我聽嘅。」我回憶返以前嘅嘢。
 
「係咩？係我俾你聽嘅咩？」呀詩半信半疑。
 
「係啊！係車上面㗎，嗰陣你俾我耳機我，然後我聽你聽緊嘅歌。」我解釋返，不過可惜，都無用。
 
「下？我真係唔記得喎。」呀詩笑住同我講。
 




「我以前好唔鍾意周杰倫啲歌，都係因為你，我先有聽佢啲歌。」
 
有陣時，歌就係有咁樣神奇嘅力量。可以因為一首歌，而橫跨咗時空，短暫體驗穿梭時空嘅滋味。
 
我依家同呀詩講緊嘅事，已經係差唔多五、六年前嘅事。
 
原來已經過咗咁耐，嗰一刻，到依家我都仲係記得好清楚。