《我的MK妹同桌》第二季: 177

到咗呀詩生日，我先發覺原來咁快就一年。呢一年我投身係啲功課啊、project度，然後仲有閒時返下part time，一個月又一個月咁，好快就過咗去。
 
呀詩亦都係咁，大家都識得俾自由同埋時間大家，又唔會話一穩定就犯賤，係要搵嘢嚟嘈下咁，所以其實都無乜太特別嘅嘢。
 
而且仲要每次有啲開心嘢，特別事發生，I mean拍拖嗰啲呢，間唔時一兩次會覺得特別甜蜜，特別開心。
 
然後第二日訓醒要再趕功課啊，要返part time啊，就覺得個轉變好撚大⋯⋯
 
有陣時轉變唔切，我仲沉醉係嗰一個moment，仲未享受真啲嗰個味道，就要入返嚟呢個繁忙嘅伺服器。
 




「今年帶我上嚟整蛋糕啊？」呀詩佢事前唔知佢生日會有咩節目，因為我死都唔肯講，但其實無乜特別，唔係啲咩驚喜嘅嘢。
 
只要唔講，就會令佢有幻想，有期待。
 
做到咁嘅效果已經ok。
 
「估唔到呢！」
 
「驚唔驚喜！」我派膠。
 




「驚喜，實驚喜，我根本都估唔到你會想做啲咩。」我見佢表情都開心，我先安心啲。
 
「今年無乜點特別準備啊，後面都唔會有啲咩忽然間俾啲驚喜你嘅節目，今日淨係整蛋糕，食個飯就無㗎啦。」我事先聲明，我廢事佢有啲咩期待。
 
「得啦，我真係OK㗎，我似啲死港女咩！要你食你好貴嘅high tea咩？整下蛋糕都幾好啊。」呀詩滿意地笑一笑。
 
「兩位呢邊啊。」我哋等咗一陣，個服務員就帶我哋去自己嘅位，簡單介紹下啲儀器啊、工具啊點樣用，有埋Ipad教我哋點樣整，我哋只要跟住嚟整就可以。
 
我哋聽完之後就開始了。
 




「喂！唔係拎呢個啊，呢個係用嚟量嘢㗎，我哋都唔洗用住。」呀詩一開波，真係咩都未做，諗住拎嘢開始整蛋糕⋯⋯
 
就已經俾佢屌，屌完又俾佢笑⋯⋯