《我的MK妹同桌》第二季: 176

「hi，你記唔記得我啊？」個男仔第一句話咁樣同呀詩講。
 
然後我見呀詩係hea應佢，好簡單咁覆佢。
 
「之前我有留意到你身上帶住啲XXX嘅嘢，你係咪好鍾意XXX㗎？」嗰樣嘢係呀詩一路都好鍾意嘅卡通嚟。
 
基本上，每一個女仔都有一個自己好鍾意，或者好有代表性嘅公仔。
 
「係啊。」呀詩就咁樣簡短地覆佢。
 




「最近有個呢個公仔嘅展覽，有無興趣一齊去睇啊？」
 
「我最近都好忙啊。」
 
「但係等你忙完嘅話個展覽就完啦喎。」再外加個表情符號。
 
越後面，我就碌得越快，無仔細問，因為呀詩嘅對答都好正常，都係好婉轉咁say no。
 
不過個男仔就好似開咗個頭，不停問，然後又再R水吹。
 




「睇完未啊？睇咁耐。」呀詩係隔離催我。
 
「要睇得仔細啲啊嘛，如果唔係點查到線索呢？」我講笑嘅語氣。
 
「屌你！」呀詩又打我。
 
「睇完啦。」我俾返部手機佢，依家啲男仔咁樣溝女㗎咩？我心諗。
 
「點啊，睇完覺得點啊？」呀詩問我。
 




「其實無嘅，就算你同其他男仔出去，我都唔會阻止你嘅，有啲社交係要去嘅，我都唔想你嘅生活重心淨係係我度，正正常常嘅男仔嘅話，做朋友都無乜問題啊。」
 
「同埋啊，如果你要瞞我出去偷食嘅話，我一定唔會知道嘅，我覺得一段關係要行得耐，就要有基本信任，而且仲要唔好隱瞞。」
 
「你唔係香港嗰陣，我哋咁樣先唔會鬧咁多交⋯⋯」我認為咁樣對我哋兩個遲下long d嚟講，會係件好事。
 
「知啦！知你最錫我啦。」呀詩聽完冧到⋯⋯成個貓仔咁嗲我，係咁痴埋嚟。
 
如果你真心錫一個人嘅話，對方一定感受得到。
 
「咁你點睇？有咁多男仔係你身邊，想溝你喎？」雖然係試探性嘅說話，用著講笑嘅語氣問，但其實係真心想知嘅嘢嚟。

「你自己覺得呢？」呀詩用佢迷人嘅大眼望住我。
 
「你自己對呢樣嘢都無返啲啲信心咩？」呀詩係我面前舉高隻手，用兩隻手指仔做出「啲啲」嘅手勢，真係好嬲打。




 
「點都有嘅，但我都想知，究竟我有咩原因令你一直留係我身邊咁耐都唔走。」
 
「習慣囉，應該咁諗，無乜原因令到我想離開你。」呀詩佢咁樣講，令我矛塞頓開。
 
係喎，講得好有道理喎！
 
有陣時就係無一個好強烈嘅原因想離開，咪姐係等同於留係度嘅原因囉？
 
「估唔到你講呢句我又覺得幾sweet喎，哈哈哈。」
 
「你會嘅咩？平時都唔講下呢啲嘢，成碌木咁。」呀詩擺出一個嫌棄嘅表情。
 
「咩啊？我之前準備咗幾多嘢俾你，你生日啊嗰啲，唔浪漫咩？你講！」我唔忿氣。
 




「er....少少囉！少少！」然後呀詩又係度大笑，以整蠱我為樂。
 
「今年生日你又話唔想浪漫，我就唔諗有咩節目，哼！」我不甘示弱。
 
「你唔搞我都無乜問題，唔知係咪人大咗呢，個心態真係會轉，我依家唔會再諗話咩生日要過得好好，心入面會好期待有人同我慶祝啊之類。」
 
「真係簡簡單單過就ok，前面都好好地慶祝過，咁樣就夠㗎啦。」呀詩嘅諗法同我一樣。
 
基本上我都無乜點慶祝自己生日，又唔一定話要有fd幫自己慶祝啊，要搞到幾大啊，然後又要post相啊之類嘅⋯⋯
 
我覺得我係唔洗，但以前呀詩會想。
 
即使佢無講到好出面，但會隱隱約約感覺到其實佢好重視、好期待個生日。
 
應該話係大時大節。




 
只不過依家佢會想簡簡單單，可能有我哋兩個人，一齊就可以，做乜都可以，咁樣。
 
當其他人，I mean中學以前望落好摺，無乜點social嘅人，上咗U，個時間大約係中學畢業後一兩年，會不停見佢出現係ig、facebook上面，總之逢係大時大節就會po相，打一串嘢，然後慢慢由打一大串，變到得一兩行咁。
 
反而呀詩已經想低調，約嘅朋友開始係固定嗰幾個，因為聽嚟聽去都係嗰幾個。
 
明明佢都係啱啱上year3。
 
呀詩比我行得實在太超前了⋯⋯
 
今年呀詩嘅生日，過得比之前平淡。仲記得上年係陪佢去迪士尼過，然後我仲應承咗佢一樣嘢，但今年真係好大轉變。