《我的MK妹同桌》第二季: 175

因為咁，我先知其實只要兩個人仲有心，感情唔會點淡，一切都可以好似之前咁。
 
當然，有好多嘢，我哋都習慣曬，變到我哋唔需要再花啲咩功夫同精神再去了解大家。
 
只要再花啲功夫係大家度，咪一樣都會好似之前咁。
 
「我去到外國嗰陣啊，你唔可以再咁樣收收埋埋㗎啦！」呀詩將個頭埋係我心口，係咁磨，好可愛。
 
「我知啦，每日都會打俾你，每日都講下大家發生咗啲咩事，咩都講，咁就唔會收收埋埋啦！」我好順手咁摸起呀詩個頭。
 




暑假，我俾呀詩想做咩就做咩，盡情留低啲回憶。
 
因為我哋唔會知道，呢一刻嘅美好，會唔會成為日後日想夜想嘅舊回憶。
 
佢同我講今日去邊去邊，又去下沙灘，又去下啲聚會，又打工，總之好鬼充實。
 
我都有同呀詩去沙灘拍下拖，曬下太陽，影下相，po上ig曬命，我諗呢個暑假係我哋兩個呢幾年，投入得最搏命嘅一次。
 
Part time賺返嚟嘅錢，全部用曬我哋兩個度，去好啲嘅嘢，去搵下有咩我哋有興趣做，而之前未試過做，想一齊去做嘅。
 




試過去攀岩，亦有玩一啲好耐無玩過嘅嘢，好似溜冰啊之類，我哋兩個都想自己最後嘅青春入面，瘋狂啲，去盡啲。
 
我下年暑假都想去intern，攞啲經驗啊，同埋想早啲試下返工嘅生活。
 
後來的我錯了，因為返工嘅生活係一個無間地獄嚟，做乜鬼咁早落地獄呢？
 
不過綜觀呢個暑假，我好enjoy，基本上每日都好充實，雖然好攰，但身體仲支撐到，有陣時通頂玩完再去返part time都無問題。

不過⋯⋯去到暑假尾聲嘅時候，出現咗一次危機，亦令我相信香港地真係好多狗公。
 




「強b！」呀詩平時都係咁樣叫我。
 
「有樣嘢我想同你講，但係你唔準嬲㗎喎。」呀詩忽然間咁樣講，搞到我有啲緊張，唔知佢要講啲咩呢？
 
「你講咗先，我再睇下嬲唔嬲。」我唔正經咁講。
 
「邊有得咁㗎！你講咗我先講。」好明顯佢唔想俾我恰。
 
「好啦好啦，我唔嬲，你講啦。」通常咁樣講，一定係啲會令人嬲嘅嚟先，係咪先？
 
「真係？勾手指尾啊。」呀詩伸出佢可愛嘅手指尾。
 
「得啦。」我微笑一下，我笑係因為呀詩偶爾個舉動好細路女。
 
「就係呢⋯⋯最近有個男仔好似想追我咁。」呀詩拎部手機出嚟俾我睇，我直接睇到佢哋嘅對話紀錄。




 
「可能呢排多咗呢啲聚會呢，有好幾個男仔都對我有好感，點同你講呢⋯⋯個行為同埋眼神好明顯㗎，近距離啲你就會感覺到，個眼神就好似想食咗你咁。」
 
「一個人嘅眼神係最藏唔住動機。」呀詩真誠咁同我講返。
 
拍咁耐拖，呀詩都無乜呢啲緋聞，我以為係佢無同我講，原來如果有嘅話佢係會同我講。
 
「佢哋會借啲意想同你單獨兩個人相處，全部我都會搵籍口避開，但最癲嘅位係，我一早已經表明自己有男朋友，佢哋都照咁樣做，而且佢哋都係有女朋友嘅人。」
 
「我終於相信中學畢業之後，啲人唔會咁純，係學校入面好少會遇到或者聽到呢啲嘢，呀彥嗰班都係學校出面嘅事嚟，所以話社會上真係咩人都有。」
 
「咁耍多兩耍，佢哋就無再纏住我，反而有一個，不停咁搵我，約我，就算我再點樣hea覆都好，都無用。」
 
我正想講話：「咁block咗佢咪得囉。」，呀詩似乎知道我想講咩，就打斷咗我。
 




「我知，你想講話block咗佢咪得，係咪？」
 
「嗯，係啊。」
 
「但我同佢有好幾班fd，有啲佢都識，同埋都幾熟下，我唔想搞到咁薑。」
 
「你咁靚女，有狂風浪蝶係好正常嘅事嚟，但係依家啲狗公都幾猖狂，啊⋯⋯我幫你覆佢啦。」
 
「咪啊你，就係唔想搞到啲關係咁麻煩先無block到佢，如果咁簡單我就一早block咗啦。」呀詩阻止我。
 
然後我再睇下佢哋啲對話，哇⋯⋯真係唔睇過嘅話，都難以置信啊。