《我的MK妹同桌》第二季: 174

我承認，我唔係無時無刻都做到咁謹慎，我有陣時都仲係嗰個長唔大，傻更更嘅呀強，都會講嘢衝口而出，講埋曬啲戇鳩嘢。
 
所以我會令呀詩發脾氣，我兩個少不免都會鬧下嘴，嘈下交。
 
「姐係你唔想我去exchange？」呀詩眼神無比尖銳。
 
「我⋯⋯我唔係咁嘅意思。」又講錯嘢。
 
然後我下意識又想解釋，跟住就連我都有啲憎自己咁樣，因為連自己都覺得自己又係度搵籍口。
 




「咩叫你無阻止到我？姐係其實你係唔想我去？咁你前面講咩我想去咪去囉，懶係俾我自由咁。」呀詩呢個狀態好恐怖，事隔幾年，我哋甚少又再嘈到呢個地步。
 
「你唔想我去，我明㗎喎，咁你嗰陣時講咪得囉，啊⋯⋯你又好嘢喎，但你又唔講喎，收收埋埋，依家先嚟講？」
 
「對⋯⋯對唔住啦⋯⋯」我唔想俾呀詩一種我係度搵籍口嘅感覺。
 
「我唔係懶係俾自由你，而係我好清楚，只要係你想嘅，無論係你想要，定係你想做嘅，你都會做得到，其他人唔會攔得到你，包括我。」
 
因為咁樣嘈一嘈，我逼住將自己呢段時間嘅諗法都一次過講曬出嚟。
 




常言話：嗌交都係一種溝通方式。
 
應該好多人都係，去到嘈交、甚至不可挽回嘅地步嗰陣，先肯將自己心入面嘅一啲真實諗法講出嚟。
 
明知嘅道理，卻一直重複地犯著。珍惜眼前人，總係失去嘅一刻先知道要珍惜。
 
「好似以前中學，你話要脫離呀彥，唔再做一個MK妹，你做到啦；你話你會戒煙，你都做到；你話你想讀大學，最後你都做到。」
 
「其實你係一個好出色嘅女仔，雖然平時睇落好似戇戇鳩鳩，但係好識為自己諗，所以當初你同我講嗰陣，我就知其實你都諗咗好耐，先決定。因為咁，我更加知唔會攔得到你，即使心入面幾唔情願。」
 




講完之後，我哋都靜咗一段時間。
 
我以為呀詩會好快反駁我，因為每次係呢啲時候，我都拗唔贏呀詩，我自己都會覺得佢講嘅，道理都係啱嘅。
 
但今次，呀詩出奇地平靜，先令我更加驚。
 
「我想要嘅，從來都唔係因為你知攔我唔住，先俾我去咁，我知咁樣好老撚土，好tvb嘅對白，但真係㗎，個個呢個時刻都係想要個真係了解佢，明白佢，繼而支持佢嘅人。」
 
「唔係啊⋯⋯」越係講，我就唔知點解好似有理說不清咁，好似更加表達唔到我想講嘅。
 
「我真係明白點解你要去啊⋯⋯」我講到口水都乾，但就係唔知點樣都無辦法將自己心意傳遞到呀詩心入面。
 
「我點會唔了解呢？呢個都係一個好好嘅機會，我知道咗之後嗰幾日，我甚至有諗過如果你係嗰邊唔夠錢洗，我係呢邊返part time嘅錢都可以俾你係嗰邊用住先，難得去一轉啊嘛，有乜可能會唔洗錢。」
 
「只不過真係去到問心，作為一個男朋友點會捨得自己女朋友去咁遠嘅地方喎，咁理智真係話俾我知應該俾你去啊嘛。」




 
「我都係呢排先學識點樣權衡呢啲事。」
 
我就嚟講到我暴跳如雷啦，呀詩都仲係好似舊石咁企係度，用佢嘅大眼睛瞅住我。
 
「咁你仲敢唔敢唔話我知啊？你覺得將呢啲情緒收埋好好玩啊？唔捨得咪講唔捨得囉，講出嚟好失禮男人你啊？」呀詩語氣緩和返，佢臉色掛曬係度，好容易理解。
 
每次就氹返佢嘅前奏都係咁，點都要攞返啲彩先得，但我好清楚佢。
 
大大話話都一齊咗好幾年，佢嘅一笑一顰我都知。
 
「咁你捨唔捨得我啊？」我反問。
 
「唔捨得。」如閃電衝線般，迅速咁答我。
 




我俾佢毫無猶豫，飛快衝擊我心嘅溫暖搞到好感動。