《我的MK妹同桌》第二季: 172

搭咗一陣，側邊嘅位置度有人落車，咁啱就係我哋附近。
 
我俾呀詩坐，然後我捱係佢隔嚟。
 
我企係高位，而呀詩坐係度，佢靠過嚟捱住我啱啱好係心口位再落啲，而我睇到曬佢手機畫面。
 
佢捉幾次都捉唔到隻pokemon，最後又要餵嘢先捉到。
 
捉到之後，佢切換畫面，係相機影相嘅畫面。
 




我個樣因為佢低炒而變得扭曲，而呀詩拎遠少少，依舊係低炒，不過呢個畫面我哋兩個嘅樣都清晰咗好多。
 
我同呀詩都笑住咁望住鏡頭，我諗起我哋自拍都已經係幾個月前，一齊出去玩，有特別節目嘅時候先會。
 
我哋係唔同角度影咗好多相，完全唔理後面嘅途人啲目光。
 
過多陣，坐係後面嘅路人都落車，我就順理成章咁坐係呀詩後面，望住呀詩嘅背影，原來佢髮型都變咗好多⋯⋯
 
由以前MK嘅負厘子髮型，變到依家自然咗好多；同埋以前頭髮留到好長嘅佢，頭髮都越剪越短。
 




我記得佢中學嗰陣個馬尾無咁短，我對比緊佢頭髮嘅長度，真係短咗好多。
 
今日呀詩都鮮有地紮起馬尾，頭先佢話太熱，所以綁起咗啲頭髮，自從中學之後，就好少見到呀詩紮起頭髮，就算萬年一次紮起頭髮，佢都係會紮起個髻，唔係話唔好睇，係好靚⋯⋯但同馬尾係有分別，好似馬尾記錄咗以前嘅回憶咁。
 
我玩弄佢嘅馬尾。
 
輕輕一撥。
 
「喂啊！」呀詩嬌柔地轉身鬧我。
 




呀詩嘅回眸，瞬間同中學嘅佢重疊埋一齊，一時之間我都計唔到我哋離開中學係兩年定三年。
 
「仲細啊？仲整人條辮！」呀詩係典型口裡說不，身體但好誠實嘅類型。
 
然後轉過身，背住我係度fing條辮。
 
我係撥呀詩馬尾，中學唔係無玩過，但呀詩好幾次都坐我隔離，唔係坐我前面，我無咁嘅機會坐係佢後面玩佢馬尾。
 
呀詩又再轉身，帶著愛意地睥住我：「仲影唔影㗎？成日掛住整人！」
 
「好耐無整啦嘛。」有時投入咗個氣氛裡面，會唔記得啲唔開心嘅事，至少當下我無諗起頭先呀詩同我講嘅事。
 
「超！快啦。」呀詩催促。
 
我靠近電車嘅窗口度，伸個頭去呀詩膊頭，呀詩好自然咁拎高部手機，開啟前置鏡頭，露出迷人嘅笑容。




 
佢自拍嘅表情同佢以前facebook入面啲MK相都仲係一模一樣，如果俾佢知我咁樣講佢，佢一定打柒我，所以我收埋係心入面，無講到出嚟。