《我的MK妹同桌》第二季: 171

「我⋯⋯」其實我想講嘅係，就算係去幾個月都好，我都會唔捨得你。
 
但我無講到出口，原因係咩，我都唔知點解釋，原來就算一齊咗，都唔代表有勇氣講出自己想講嘅說話。
 
「都係無嘢啦。」活生生吞返落肚。
 
除咗呢一個消息，我哋呢晚係開心嘅，但係腦海時不時就會閃過「時限」呢個命題。
 
無論呀詩講定唔講，都會影響到我哋嘅關係，由呢個決定開始嗰一刻起，就已經注定咗會傷心嘅結局。
 




咁究竟係長痛好？定短痛好？我都唔知。
 
呀詩話呢段時間佢都會返屋企，暑假hall度都無人係度，之前有段時間變得平淡，忽然間依家黏埋一齊，我哋嘅關係又再次沸騰起嚟。
 
一開始我有啲唔慣，但好快適應返。
 
同時無可避免地諗，我哋時間好似得返好少咁，當下嘅我⋯⋯其實仲未諗通。
 
「我哋搭叮叮好無啊？好耐無搭啦喎。」呀詩忽然問道。
 




「好啊。」
 
有時係愛情入面，都需要有啲唔一樣嘅地方，先會滋潤枯燥乏味嘅生活。
 
我哋就咁搭搭下地鐵，過完海嗰一個站，就行出去搭叮叮。
 
即興比起安排好曬嘅快樂，會加到好多好多倍。
 
即興，考驗嘅係當下嘅氣氛，心靈相唔相通。大家都有咁嘅心，一齊話行就行，嗰種一拍即合嘅感覺，實在叫人陶醉。
 




可惜嘅係，現實唔會好似電影咁，一上到叮叮上面，就有兩個位空咗出嚟，俾男女主角坐係度，互相捱住，享受繁忙都市中嘅慢生活。
 
我哋係逼上叮叮度，係上層度企，係無冷氣嘅叮叮度感受咩係侷促。
 
「有無後悔搭叮叮啊？」我笑問呀詩。
 
「咁快就後悔？我哋有排搭喎。」呀詩佢不以為然，就算又熱又焗，佢都無怨言。
 
叮叮上面嘅人都係度捉pokemon，呀詩都拎出嚟玩⋯⋯
 
我開始覺得⋯⋯佢話要搭叮叮⋯⋯並唔係想我哋段關係可以特別啲⋯⋯
 
沿路搭叮叮返去捉pokemon⋯⋯先係呀詩嘅目的⋯⋯
 
⋯⋯⋯




 
Sor⋯⋯係我諗多⋯⋯