《我的MK妹同桌》第二季: 170

「係啊！我男朋友咁叻，梗係要好好獎勵佢啦。」佢由望住手機mon嘅眼，望咗上嚟，個眼神呢⋯⋯不自覺咁令我聯想起歪嘢。
 
「點獎勵先？」我哋前排因為忙，都無乜點見，自然嗰味嘢，就好耐無做，我都忍咗一排㗎，儲儲埋埋唔少貨。
 
「你想點獎勵啊？」無論依家呀詩做咩表情都好，我都認為係淫㗎啦，一定係想搞嘢。
 
「你知嘅！」我輕撫佢嘅手背。
 
「收皮啦咸濕仔！餓咗好耐啊？」呀詩睇穿我嘅心思。
 




「都真係好耐啦，不過你唔想，我唔會勉強你嘅。」我以退為進。
 
「今年可能係我最後一個暑假啦，可以嘅我都想享受埋佢。」呀詩倏然說起。
 
「咩⋯咩最後一個暑假啊？依家唔係year2咋咩？」我問道。
 
「我下年暑假想去實習，所以計返嘅話可能就無暑假啦。」佢咁樣講，我就明啦⋯⋯不過接落嚟佢講嘅，我就真係唔知點好。
 
「同埋呢，嚟緊year3，我想下半年嗰個sem去exchange。」呀詩瞄兩瞄我個反應。
 




「姐係下年？」我一時之間個腦未係好諗到啲咩，覺得好似好多問題咁，一時釐清唔到。
 
「係。」呀詩斬釘截鐵咁講。
 
「但係你夠錢去㗎啦？」以我所知呀詩屋企嘅家境，要負擔佢去其他地方exchange唔係咁易。
 
「我有申請獎學金，同埋之前打工我都有儲落一筆，都夠嘅。」呀詩依家咁樣同我講呢啲嘢，今晚餐飯出嚟嘅目的已經唔同咗，我寧願呀詩揀過第二啲時候同我講仲好。

「去幾耐啊打算？」我聽到已經覺得唔捨得。
 




「半年咋嘛，我無咁多錢去咁耐。」我諗呀詩同我講得嘅話，證明佢都諗咗好耐，諗清楚先同我講。
 
「咁我呢？」我忽發奇想。
 
「咩你啊？」佢問道。
 
「如果我都同你一齊去呢？」我真心㗎。
 
呀詩頓一頓，然後認真同我講：「強，我唔想你因為我去而跟住我去。」
 
「我去係除咗想見識多啲之外，仲因為我有獎學金，我覺得唔去會曬咗，同埋我可以抵咁啲學分，我係真係諗過㗎。」
 
「你唔會唔捨得我咩？」我唔想太過理性，因為我知理性上，我絕對贊同呀詩去exchange，但我唔知我哋long d維唔維持到，呢個係我哋從來都無面對過嘅問題。
 
我無足夠嘅信心。




 
我將我內心所有諗法同呀詩講。
 
「我哋將來會有好多我哋未曾經歷過嘅嘢等緊我哋，會變成點，我哋都話唔埋，唔會等到你準備好曬，先至開始。」
 
「都係睇我哋有無咁嘅心行落去姐，當一面對啲唔知點好嘅難關，就驚驚青青咁，其實都好難行落去。」呀詩收起部手機，無好似頭先咁玩pokemon go，本來輕輕鬆鬆嘅氣氛，因為呢個話題而變得嚴肅。
 
「我想早啲話俾你知，好等你有個心理準備⋯⋯但可能我真係講得唔係時候。」呀詩低頭，輕咬著唇。
 
「有陣時，我都會做得唔好。」好地地，做咩無啦啦搞成咁？今日出嚟我並唔係想咁。
 
「唔係啊⋯⋯你無咩做得唔好喎。」我嘗試氹佢，餐飯我都無乜胃口食添。
 
「咁你覺得我哋捱唔捱得過long d？」呀詩問到我不知所措。
 




「我⋯我⋯⋯我都唔知啊，唔試過點知姐。」我答。
 
「但我覺得我哋捱得過，我有信心。」我唔知點解呀詩會咁堅定，但我聽到係開心，同埋安心。
 
原來係呀詩心目中，對我哋呢段感情咁有信心，無猶豫過。