《我的MK妹同桌》第二季: 169

好彩嘅係，我入返U，總算無辜負呢兩年係咁努力讀，又多project，又多測驗，考試嗰排無得同呀詩見下。
 
我搏返係九龍城嘅U，嗰種難以置信嘅感覺，keep住咗好幾日興奮，不過就同呀詩唔同U⋯⋯
 
「幾好啊！！入返U已經好好啦！」呀詩聽到呢個消息，都好登我開心。
 
「但我無得同你同U喎⋯⋯」我扮可憐。
 
「同唔同U又有咩所謂啊？咁樣我哋可以去大家嘅U度行下都幾好啊？」呀詩講得有啲牽強。
 




「點同姐！我哋無得一落堂就過嚟搵下，或者一齊係個校園度拖住手拍拖，都唔同。」
 
「你真係笑鬼死我，邊有幻想得咁美好啊？落堂就返hall㗎啦，係校園行？咪玩我啦，落去買個飯，頹look我都覺得攰啊。我諗你係咪睇啲咩劇睇得多？現實嘅係喺校園行嘅話，只會係頹T踢拖，不知幾多去上堂嘅人都係著住ocamp件營T。」呀詩赤裸裸咁道出事實。
 
佢講嘅我都知⋯⋯大學唔係自己想像中咁美好，但⋯但係⋯⋯呢個係我讀兩年asso上嚟嘅動力，點知一得悉呢個消息，就打破曬了。
 
「今晚出嚟慶祝下啦！咪咁sad啦，哈哈哈哈哈。」呀詩反而笑得好鬼開懷。
 
呢個暑假，吹起一陣熱潮⋯⋯
 




就係pokemon go。
 
呀詩係我面前玩緊pokemon go，佢出到嚟，佢話：「呢個地方我仲未嚟過，頭先捉到幾個新嘅pokemon。」
 
「洗唔洗啊？講到好偏僻咁，明明平時拍拖都係咁姐。」
 
「我捉得好少咋，我hall啲fd都捉咗唔少，佢哋話搭車都會捉，仲多咗出去行添，我哋學校有啲特別版嘅pokemon，個個都係度搵緊。」
 
乜唔係出嚟幫我慶祝咩⋯⋯？我屌啊？
 




「我都有玩，之前搭丁丁成架車啲人都係度玩緊pokemon go添。」
 
「係喎！搭丁丁都幾唔錯喎。」呀詩雙眼發光，我都唔明呢種熱潮真係有咁吸引？
 
「乜唔係同我慶祝入U㗎咩？」我望住佢，用最熾熱嘅目光。