《我的MK妹同桌》第二季: 168

「你無非都係想我講：『無論你變成點都好，我都係會咁愛你啊嘛？』，係咪？」我笑住講。
 
「知你仲問！」呀詩成日俾我激到反曬白眼，高潮咁嘅款。
 
「真係呢⋯⋯我真係覺得還好呢，邊度肥姐你。」我如實作答。
 
「你啊，成日身在福中不知福，呢啲先幸運啊。」我講完之後，呀詩好明顯唔想理我，不過就笑笑口咁囉。
 
我哋嘅拍拖日常就係咁，時不時就笑下咁囉。
 




「唔理你啊！出返去啦你！」呀詩推我塊面，趕我走。
 
可能就係有呢啲不可多得嘅日常，我哋先可以拍拖拍到依家。
 
下半年好快過，新年嗰陣有帶呀詩同我屋企人仲有幾個親戚一齊飲茶，個個都讚佢又靚女又乖，第一次見面講到好似好熟佢咁，啲親戚把口真係乜都講⋯⋯
 
其他朋友問起我同呀詩點嘅時候，都會講起話我哋都見咗家長，佢哋都會講話：「哇，你哋咁快啦？咁快就見家長？可以結婚啦喎。」
 
當佢哋咁講嘅時候，我就唔明啦⋯⋯
 




乜見家長同結婚係掛鉤嘅咩？
 
不過佢哋有樣嘢講得啱，就係估唔到我哋year2都未完就見家長，同埋係佢哋現階段想像唔到嘅事嚟。
 
因為有啲都仲未拍拖⋯⋯然後用啲又羨慕，又酸嘅語氣同我講，搞到我都唔知俾咩反應好。
 
去到year2嘅sem尾，我哋最擔心，最頭痛嘅一段時間，驚自己嘅成績啦，我知好多中學無乜點讀書嘅，上咗嚟asso都好睇重成績，因為個個都想爭返上去。
 
出完成績後又要去in學校啦，又唔知搏唔搏到啦。
 




呀詩陪住我，成日聽我呻，我平時係好少會呻嘅人嚟，男仔其實無咩好呻，通常都係聽呀詩呻多啲。反而咁樣呢，呀詩知我真係好驚，更加陪住我。
 
雖然無做啲咩好特別嘅嘢，就咁係電話度聽我講，安慰下我，俾啲信心我咁樣。
 
但我已經覺得夠多。
 
有咁嘅心係度，已經難得。
 
呢段期間，我哋圍內比較熟嘅就互相俾料，睇下大家嘅去向，雖然得小雞三四隻，好過無嘅⋯⋯呢啲時候最慘就係孤軍作戰。