《我的MK妹同桌》第二季: 167

終於都走咗啦，我送呀詩返去，趁兩個人嘅時候，當然會問起頭先餐飯。
 
「下？無咩點啊，頭先餐飯幾好啊，我不嬲都話羨慕你屋企㗎啦。」呀詩平靜地說，呢個反應令我有啲意外，我以為呀詩心驚膽戰完添。
 
睇嚟佢頭先得心應手。
 
「我以為你會俾我老媽嚇親添。」我直言。
 
「係啊，有嚇親啊⋯⋯我以為佢會唔鍾意我，因為電視啊⋯⋯網絡上面啲人都話婆媳關係好複雜，好多啲呀媽都唔鍾意自己。」
 




「甚至呢啲關係成世都係咁僵硬，所以我一開頭會咁驚就咁解，但係頭先食飯嗰陣，我就唔係咁諗。」
 
「我第一次感受到有媽咪嘅好。」
 
我醒起呀詩係單親家庭，一向都無媽咪陪伴嘅佢，我無辦法完全明白。
 
我沉默。
 
因為我唔知講咩好，講啲懶係搞笑嘅說話又唔啱場合，安慰⋯⋯又驚到喉唔到肺，索性唔講。
 




「所以其實幾好，餐飯係我久違嘅溫暖，我唔知幾耐無同屋企人咁樣食過飯，我同我老豆不嬲都唔會一齊食，我煮完，都係擺係度，唔知佢幾時會返嚟食。」
 
「就算我同朋友出去玩得幾開心，中學嗰陣出去蒲，大學搬出去住，有朋友陪，出去玩得好開心都好，我屋企始終都係孤伶伶一個。」
 
「最後其他朋友都會返屋企，當然，有啲屋企唔係咁和諧，我知嘅，至少佢哋返去係有人等，而我係唔會有。」
 
「我真係未體驗過天倫之樂係點，不過我今日感受到，雖然你會嫌棄你媽咪長氣、囉嗦，但其實係福份嚟，因為有人關心你，屋企人嘅關心，同朋友係唔同。」
 
「朋友嘅關心，係短暫嘅，有事起上嚟，你唔會奢求佢關心，佢無咁嘅義務，有嘅話，係好彩；但屋企人嗰種關心，係一種依靠，你知點都好，背後返到去，都有佢哋。」
 




「你去餵流浪狗，同你屋企養隻狗仔，都係唔同嘅。」

「你可以當呢度係自己屋企咁喎。」我沿路同呀詩講。
 
呀詩無回應，只係莞爾一笑。
 
然後我哋又講下其他嘢，佢睇啱啲咩衫啊，話咁樣靚唔靚啊之類。
 
我成日都笑呀詩佢幸福肥，的確佢對比起中學，明顯係肥咗少少，佢成日都講話自己好肥啊好肥啊⋯⋯
 
同時好彩嘅係，佢個波又真係有漲到，個手感比之前明顯有增加，玩到愛不釋手⋯⋯
 
我覺得以前呀詩嘅身材係更加豐滿，應有盡有，佢都話有啲衫佢著唔落，要買過一啲，連啲bra都係。
 
身為男朋友嘅我，呢啲係福利，同時間亦都有義務。




 
陪佢去行女性內衣店，係件好撚尷尬嘅事嚟，一開頭。
 
呀詩拖住我入去，然後睇得好投入，仲問我邊套好睇啲⋯⋯
 
「Er.....我唔識睇女人內衣㗎喎。」我咁樣答佢。
 
我點會估到女人諗乜啊，佢眼神睥住我，斜斜地咁，眼神嘅用意不明。
 
然後佢係我耳邊輕輕咁同我講：「咁我咪又係著俾你睇。」
 
我屌⋯⋯我即刻畫面出曬嚟，忍唔住偷笑。
 
「咁係咪好應該你揀先？」呀詩講得好有道理。
 




之後我先發覺自己做咗水魚，因為咁樣呀詩就唔洗煩要諗買乜bra好，只要係我揀完之後，佢再揀個啱心水嘅就可以了。
 
呢個機關算盡嘅女人。
 
呀詩身材豐滿咗之後，越嚟越有女人味，喺男仔嘅角度其實係啱啱好，但喺女人眼中，就係點都唔夠瘦，唔夠靚。
 
「點算啊，好肥喎。」呀詩佢拉開半邊簾，探出個頭嚟問我。
 
呢種若隱若現就算同佢拍咗好耐拖，都覺得好正，好吸引。
 
我唔知呢間店俾唔俾我咁做，我都照探個頭入去望下。裡面有一塊落地嘅大鏡，呀詩全身同埋我個頭嘅倒影都照曬出嚟，呀詩全身得返內衣，佢全身上下都俾我睇過曬，無咩好大驚小怪同埋怕羞，所以可以用客觀平靜嘅態度去觀望。
 
「唔會啊，唔會好肥啊，身形比例好好啊。」我真心讚美。
 
「但係你睇下⋯⋯」呀詩係個肚腩度擠咗舊出嚟，扁曬嘴咁講。