《我的MK妹同桌》第二季: 166

「醫生咪話要戒口囉，多啲做運動囉，我哋依家好養生㗎啦，得閒就去跑下步，你呀媽就游下水，不過成撚日游游下水走去打麻雀。」
 
我竟然都唔知添⋯⋯可想而知我平時真係無乜點關心過佢哋。
 
「好啦，遲下同你去跑下步啦。」今日佢哋每一個，都觸動到我內心，動搖到我，無喊，亦都無表現出嚟，我嘅表情仍舊平和，但好幾次令我起雞皮疙瘩，仲洋溢住幸福感。
 
只不過係呢一種幸福感，並唔刻骨銘心，好似以前一啲以前刻骨銘心嘅事，都會淡忘，諗返起都會猶疑嗰個人係咪自己嚟？
 
我哋總會重生。
 




所以我並無覺得今日餐飯好難忘，難得自己緊張嘅人一齊食到餐飯，因為我知呢一個moment總會過去。
 
無特別眷戀。
 
飯後坐低睇一陣電視，佢哋日常就係睇下TVB啲劇集，得閒就加把嘴，睇咗一陣我就話送呀詩返去，走先。
 
我知呀詩唔係咁想長留，以佢嘅性格會驚打擾到我哋。
 
不過呢個和樂融融嘅屋企，都會因為幾年後發生大單嘢而嘈大鑊⋯⋯呢單嘢牽涉成個香港。
 




「都夜啦，聽日呀詩仲有嘢要做，我送佢返去先。」我同兩老講。
 
「哦⋯哦⋯⋯好啦，小心啲喎，唔洗咁急返嚟喎，去拍下拖先囉。」我老媽食住瓜子同我哋講，明明啱啱先食完飯⋯⋯
 
「係啊，咪淨係送到樓下就算啦！」佢哋一人一句真係好鬼死長氣。
 
臨別秋波，呀詩同佢哋客客氣氣，有禮貌咁道別。我老媽呢，就一切如舊，一樣好似一開頭咁熱情。
 
係咁講話：「下之再嚟啦，唔洗怕羞喎，當自己屋企得啦！」
 




好似已經當正佢係新抱仔咁⋯⋯
 
媽啊⋯⋯人哋都未知係咪肯嫁俾我啦⋯⋯
 
最死火係，我老豆都附和埋一齊，話我有咩對佢唔好，記得要同佢哋講，佢哋會幫呀詩出頭嘅！
 
總之就成個走廊都好嘈啦，羞家到呢⋯⋯我都唔知隔離鄰舍點睇我哋啊真係，又笑得好鬼死大聲喎，好想搵窿捐。