《我的MK妹同桌》第二季: 165

我都見到老媽係度陰陰嘴笑，笑到含春咁撚樣。
 
比我想像中和諧。我原本都同呀詩有一樣嘅擔心，唔好以為嗰個係自己老豆老母就咩事無，但去到當日嘅時候，我都一樣唔知我老豆老母點諗⋯⋯
 
以前中學嗰陣帶咗個MK妹返嚟屋企，依家仲同佢一齊，帶佢返嚟屋企食飯，以我屋企平時咁舊守，咁傳統嘅思想，真係唔知會演變成點。
 
好怕佢哋會覺得呀詩係嗰啲一早就出去學壞嘅女仔。
 
點知好似TVB咁嚟個大反轉⋯⋯搞到我笑起上嚟有啲搞笑，老媽同老豆都幾接納呀詩，睇怕佢哋真心覺得除咗呀詩，唔會有人再要佢個仔。
 




咁又係嘅，由細到大都無令老媽老豆驕傲過。
 
佢哋只不過係想有個人真心對待佢個仔，一齊行埋人生後面嘅路就夠。亦都知道依家出面啲人對待感情係幾咁兒戲，依家知道我同呀詩一齊咁耐，都無乜特別嘢發生，已經令佢哋好安心。
 
「我幫你哋洗啊。」呀詩食完飯之後幫手執枱。
 
「唔洗啦，你係客人嚟㗎啦，我洗得㗎啦。」老媽笑到見牙唔見眼，隻眼都笑到變咗個腰果咁，望落成個簡淑兒咁。
 
呢排係我見老媽笑得最開心，最開懷嘅一次。
 




感覺佢後生咗，但老媽嘅兩鬢，已經滲入咗白色嘅色素。
 
頭先坐係度一齊食飯嘅，原來係我最重要嘅人，我都意識唔到。
 
「唔好嘅，我幫下手好，唔想白食。」呀詩有啲堅決。
 
「你睇你呀媽幾開心。」老豆食完飯，行埋去沙發睇電視嘅時候講。
 
「之後多啲帶呀詩上嚟食飯啦，一齊食餐家常便飯，唔洗太過拘謹嘅。」老豆語帶輕鬆。
 




「你老媽子啊，佢依排多咗啲老人病，成日又話呢度痛嗰度痛，我自己身體都唔同以前啦，三高入面我都佔咗兩樣啦。」
 
「你都要好好睇住自己身體先得啊，咪以為後生就亂咁嚟啊。」老豆食住水果，同我傾起呢個話題。
 
聽完之後，我有種無力感。唔想咁，但又無辦法，只能夠係咁，亦唔知點做好，而且佢哋自己都知自己要做啲咩，唔輪到我教佢哋點做。
 
「咁醫生點講？」我緊張地問。
 
對於老豆老媽子嘅情況一無所知嘅我，我覺得自己好不孝。