《我的MK妹同桌》第二季: 164

「你女朋友仔比之前靚咗喎。」老豆見呀詩去咗廚房，然後同我講。
 
「梗係啦！我揀㗎喎。」我得意洋洋，起碼比老豆你揀得好先啦。
 
當然，呢句說話我無講出口。
 
佢哋有佢哋忙，我同老豆就度睇電視俾老母鬧⋯⋯
 
「你兩個！咩都唔幫手，淨係識坐係度睇電視。」老媽子又發功了，佢終於都整好曬。
 




今晚好好餸，果然我老媽落足心機，呢餐都唔知係咪鴻門宴嚟。
 
「有老婆係度就得啦嘛。」老豆係度賣口乖，咁又係，又食又拎，佢就爽曬啦。
 
「好！開飯。」
 
呀詩佢客氣咁慢慢食，以我所知嘅佢，平時絕對唔會食到咁斯文！
 
感覺，呀詩已經係我老婆咁，當我哋行到呢一步嘅時候，其實已經行到好遠好遠。
 




試諗下，當初點會諗到會有依家嘅光景，就連複合嘅時候，都無諗過。
 
依家自自然然，感受到個重擔。
 
係未拎起筷子食飯嘅時候，呀詩靜靜地係枱底下面捉住我隻手，隻手傳遞出嘅冰冷亦顯示出佢嘅緊張。
 
我哋就好似古代人咁，係等待父母長輩認可嘅小情侶。
 
「呀詩，食菜啊。」老媽子難得慈祥咁講。
 




「唔該Auntie。」呀詩禮貌上回應。
 
「Uncle，Auntie，你哋都食嚿肉啊。」呀詩回禮返俾佢，的確，呢餐飯呀詩食得好拘謹，但係印證住我哋嘅成長，一個我哋從未接觸嘅領域，未曾想過嘅領域。
 
呢餐飯，幾溫馨。我以為我老媽子會問長問短，我怕呀詩會難堪，但出奇地，老媽並無咁做。
 
以我平時老媽問長問短嘅性格，同埋係屋企邪惡兼強硬嘅勢力，佢絕對可能咁做！
 
「你平時鍾意做啲咩多㗎？」老媽問。
 
「你成日咁多嘢講，你唔驚嚇親呀詩啊？」老豆插把嘴埋嚟。
 
「你個衰樣夠嚇親人啦！」老媽絲毫唔俾面。
 
「無啊，會跑下步，睇下書咁。」呀詩不慌不忙。




 
「老媽啊，你唔好搞到好似interview咁先得㗎！」我笑道。
 
「挑！你識咩啊？你呀媽我要好好多謝人哋平時咁照顧你啊，你咁嘅款有人肯要你，你執到啦。」呀媽又嚟了。
 
呀詩食住啖飯，轉個頭望一望我，用一個別有意味嘅眼神，盯著我。
 
我諗個意思係：聽到啦？連你呀媽都係咁講啊，仲唔對我好啲？
 
「係嘅，係嘅，你睇下我平時對佢幾好？」我將啲蝦殻剝好，然後放落呀詩個碗度，以表誠意。
 
我瞄到呀詩嘴角泛起嘅甜意。