《我的MK妹同桌》第二季: 163

當晚呀詩上嚟食飯，我陪佢去買啲果籃啦，佢真係隆重對待，化曬妝啦，著咗條得體嘅深藍色連身裙，我第一次覺得呀詩佢可以散發出咁靚嘅氣質。
 
我唔需要啲出身太好，飽讀詩書嘅大戶人家。
 
我只要好似呀詩咁，得體、識得分場合、識得為我諗嘅女仔就夠。
 
「點啊？咁樣著好唔好啊？」呀詩一臉緊張地說。
 
反而覺得咁樣嘅佢好可愛，呢排佢要面到死，但骨子裡脆弱到不得了。
 




「好，點會唔好，今日全場最靚係你！」我氹下佢，拖住佢，錫啖佢。
 
「唔洗咁緊張喎，家常便飯咁咋嘛，不過過年前咁樣食飯，我諗新年再叫你上嚟食就少不免㗎啦，唉⋯⋯遲下係班親戚面前，實左問右問。」
 
「唔係怪？咁點好啊？我唔識應付啲親戚㗎喎⋯⋯我屋企無乜親戚，啲親戚唔係上嚟借錢，就係叫我老豆還錢。」
 
「咁多年，我都唔識應付佢哋，咪由得啲三姑六婆講囉，一年先見佢哋一次。」我輕撫呀詩個頭，安慰佢。
 
只有呢啲時候，呀詩先似返個小朋友咁。
 




「話就係咁話姐，但我都想留個好啲印象啊嘛，如果你屋企人好好，我都想佢哋鍾意我㗎。」佢認真得很可愛。
 
「你唔好諗咁多啦，我鍾意你咪得囉，你同我過人世定同佢哋過人世？」
 
「口甜舌滑！不過你今日係幾靚仔嘅。」
 
「哇？依家就賣口乖，氹人啊？你唔洗收賣我喎，我不嬲都企你嗰邊嘅。」我俾佢整到笑，條友都Kai Kai地。
 
「你梗係要企係我嗰邊啦！」
 




我哋好似有咗前進嘅動力，開始覺得結婚對我哋嚟講，近咗。
 
我哋只要有心，就可以一路keep住。
 
我係咁諗。
 
「哇⋯⋯乜客氣啊？」老媽子一開門，好熱情咁打招呼，從未見過老媽咁嘅樣嘅我，一碌木咁企咗係度。
 
呢個女人城俯究竟有幾深⋯⋯
 
「要嘅要嘅。」呀詩有禮咁同老媽講。
 
「咪同你講咗唔洗買嘢上嚟囉，又唔聽，我哋邊好意思呢？」老媽子訓斥我。
 
⋯⋯




 
你邊有講過啊？
 
但我只能夠用生命值硬接。
 
我落一陣街嘅，屋企就好隆重咁，因為好明顯見到乾淨咗好多，同埋整齊咗，再加上枱面嘅飯餸⋯⋯
 
我只不過落去接一接呀詩，買個果籃，返上嚟咁多樣嘢唔同曬？哇⋯⋯老媽子真係唔話得。
 
「你哋坐下啊，好快有得食㗎啦。」老媽子急急腳咁入返廚房。
 
「嗨！你好啊。」老豆坐係沙發度睇電視，好休閒，佢總係可以有方法做到同個氣氛格格不入。
 
當我哋所有人都緊張到乜咁，好大件事咁，佢總係會冷淡到好似無一回事咁，畢業禮又係，去旅行又係，甚至乎自己做啲小手術又係。
 




「啊⋯⋯你哋坐啊。」老豆並唔係叫我。
 
「我去睇下廚房有無嘢幫手先啊～～」呀詩擺一擺低啲嘢，就諗住入廚房幫手，我都估唔到呀詩會有此一舉，相信老媽子實開心死。