《我的MK妹同桌》第二季: 162

「下？」我食食下飯，聽到老母咁講，即刻停低，望一望佢表情。
 
「聽講你都拍咗好耐拖，都差唔多俾我哋見下啦下話？」老媽子講呢句嘅時候係笑笑口咁講，但聽緊嘅我會感到一服寒意。
 
「好耐啦咩？」我扮嘢。
 
「個女仔係咪就係之前上嚟我哋屋企嗰個呢？」老媽子好似咩都知咁⋯⋯
 
「咪得閒帶佢上嚟食下飯俾我哋識下咁囉。」老媽都講到咁，都無得唔帶啦。
 




不過我哋的確拍得耐，要見家長都係遲早嘅事，我哋算大個又未算真係大個，但話細，都已經唔細。
 
至少屋企人唔會再反對啲咩。
 
因為屋企人咁樣輕輕提過，我夜晚都有同呀詩講呢個問題。
 
「哦，去囉。」呀詩好爽快咁答應。
 
「哇！咁爽快？」我懷疑自己係咪聽錯。
 




「下？有咩好諗啊？」呀詩笑住咁反問我。
 
「你唔會緊張咩？見家長喎。」
 
「之前都見過啦，同埋遲早都會見嘅，不過話唔緊張嘅話係呃你嘅，我唔知你哋屋企會唔會接受我嘅出世，而且我都唔知點做先至得體⋯⋯」
 
「同埋我驚我之前俾你屋企嘅印象唔好，你估我無諗過呢個問題咩⋯⋯」呀詩嘅語氣充滿擔心，佢並唔係佢口講嘅咁震定。
 
真係想威又要戴頭盔。
 




「依家就嚟驚啊？」我輕量級咁挑戰佢。
 
「你講咩啊？我幾時有驚啊？」依家呀詩講句嘢已經知佢想點，老夫老妻咁，所以嚟到見家長都好正常。
 
「無啊，你點會驚呢？」反話中嘅反話。
 
「哼！你專係嚟搞事㗎喎？你真係呢⋯⋯都唔知點解我會鍾意你。」
 
我哋夜晚傾電話嘅時間開始少，間唔中有特別事先會傾耐啲，甚至去到呢啲位，我哋都有共識我哋都拍到好穩定，老夫老妻咁。
 
頭先餐飯，老媽子都語重深長咁同我講，其實佢只不過係長氣。
 
「仔，你哋拍到咁耐都唔易㗎啦，依家啲後生仔女，幾多人離離合合，我公司有同事話，佢個女成日拍拖唔夠三個月又換人，無一段感情行得耐。」
 
「又係咩你哋以前嘅感情係維修，我哋依家係換過個嗰啲嘢？」




 
「屌你個衰仔，唔係啊！」老媽都無我咁好氣，兜嘢打落我個頭度，由細到大佢都係屋企最大，最霸道嗰個。
 
「我只係話，你要好好珍惜個女仔姐，一個女人，陪你行咁耐，唔容易。」
 
「呀媽無咩文化，係以前好彩，同你老豆一齊買咗呢間屋，生活先至好啲，依家啲樓係咁升，要再買多間嘅話，唔好講你啊，我哋都好難啦。」
 
「所以出面啲女仔有幾現實，呀媽唔係唔知，我都想你搵到個好依靠。」
 
「呀媽老㗎啦，一把年紀求嘅嘢唔多，你同老豆開開心心就夠。」
 
確實，呀媽呢幾年啲小病周不時都有，雖然唔係話好嚴重，但睇得出佢一病，都要一段長時間先好得返⋯⋯我呢排都發現呀媽老咗咁，慢慢，先正視屋企嘅問題。
 
以前中學淨係識向外跑，同朋友出去玩，去拍拖，打機，屋企嘅嘢，基本上唔會理。但係當正視返呢個屋企嘅時候，先發覺個壓力，同埋責任，非一般嘅重。