《我的MK妹同桌》第二季: 161

蕃薯仔用沈默嚟做回應，佢不停嘔，好似要將所有思念嘔返曬出嚟咁，咁樣心就可以無咗子晴，一乾二淨。
 
「就算放唔低佢啊，都唔洗用咁嘅方式嘅，如果因為咁而傷害到一個女仔嘅話，你覺得會點？其實係一個惡性循環嚟。」唔擅長安慰嘅我，紋盡腦汁都淨係講到咁嘅說話。
 
「你忍心因為咁而傷害下一個對感情認真嘅人？」我問道。
 
「子晴對你呢段感情都唔係唔認真啊，佢依家唔愛你都同你講，而唔係派帽俾你，其實你哋可以好嚟好去。」呢個時候嘅蕃薯仔，的確需要人陪伴。
 
希望醉緊嘅蕃薯仔可以稍為清醒落嚟，依家嘅佢，一樣都辛苦，我唔覺得佢因為咁而開心咗，反而令自己跌入更沉重、更無盡嘅深淵。
 




「好返啲未啊？」呀詩關心佢。
 
「嗯。」蕃薯仔企返直個人，抖一抖先回應。
 
我哋送佢返去，就結束咗今日個酒局。
 
不過最後，蕃薯仔都照樣有去酒吧啊，有落club玩，snapchat上成日都見到佢po啲昏暗環境下嘅場合。
 
依家真係越嚟越多app，有時同朋友傾嘅對話會出現係唔同嘅app度，各自會有唔同嘅話題。
 




當我見到蕃薯仔咁嘅時候，證明自己嗰陣同呀詩一齊講嘅嘢，佢並無聽入耳。
 
我亦都只可以同自己講，已經盡咗力，咁唔代表自己講嘅嘢一定啱，佢一定要聽我哋講。
 
最終，呢一個都係佢嘅選擇。
 
即使作為朋友，見到佢咁樣都會感到心痛，同埋無助。但係亦都只能夠咁樣，唯有等佢經歷下，過一段時間，慢慢就會好。
 
我都無剝削蕃薯仔成長嘅權力，人係需要啲歷練。
 




開始接觸得多殘酷嘅社會，努力唔等於有好結果，盡心為人好唔一定會領你情，朋友唔再係成日係你身邊，終究你需要為自己好好地打算。
 
畢咗業只不過唔夠2年，但可以想像到往後只會遇到更多呢啲徒勞無功嘅嘢。
 
過後，臨近新年嘅時間，我兩老開始發功⋯⋯
 
係一餐平平無奇嘅晚飯入面，老媽子率先開口問：「幾時帶女朋友仔上嚟食個飯啊？」