《我的MK妹同桌》第二季: 160

我後尾係喺嗰度閉目養神，睜開眼嘅話，我會好暈，反而閉上眼就無乜事。
 
後來無乜事，又玩咗一輪，但我無飲得頭先咁激烈，同埋飲少咗嘅。
 
好快，去到3點幾4點，大家開始散，個狀態都差唔多收皮，有啲係要走去嘔，其中一個係蕃薯仔。
 
佢係玩到嘔曬，係度亂咁嗡，係我哋面前抽啲女仔水，又攬腰啊，又錫咁。
 
不過最誇張嘅，都唔係佢，而係其他人都係咁之餘，有啲仲要揸曬波，而啲女唔抗拒⋯⋯
 




我拉開呀詩，用僅存嘅意志，將佢拉過嚟，坐我隔離，攬實佢，護住佢。
 
痴線，真係俾呀詩咁樣落呢啲酒場，真係會渣都無得剩。
 
最後蕃薯仔仲醉過我，睇得出佢已經神智不清咁，亂咁係度笑啦，亂講嘢啦，行路都唔穩。
 
我頭先抖一抖反而無事，蕃薯仔就以為佢好飲得，點知最後都係貓咗。
 
「點解喎⋯⋯」蕃薯仔講。
 




「點解都仲係咁空虛。」蕃薯仔講完，個樣有啲奇怪，下一秒就已經係街邊嘔。
 
我同呀詩扶住佢㗎啦已經，但我唔知點搞好，由佢係嘔，嘔清啲舒服啲嘅。
 
嘔完，佢真係精神啲。
 
「我成個人都好空，個心好空⋯⋯」
 
「你咁落去你覺得好咩？你覺得子晴會咁樣返返嚟？」呀詩理智咁講道。
 




「我唔知啊，我淨係知我唔會再信咩愛情，咁樣玩唔好咩？大家都出嚟開心咋嘛。」
 
前面有對情侶係街燈底下卿卿我我，而再遠處，有對情侶拖住手咁行埋嚟。
 
係呢啲臨近節日時份，見住人哋咁羨煞旁人，蕃薯仔眼內更不是滋味。
 
「挑！就睇你哋行得幾耐，愛情係信唔過㗎！」
 
「再真心咁又點姐，咁不如一開始玩弄感情？」
 
中學嘅佢，相信純純嘅戀愛，因為不甘而選擇咁樣，開始覺得，扭曲緊嘅，其實係蕃薯仔。
 
佢哋段關係，無背叛，曾經真心過，由頭到尾子晴都係真心對待蕃薯仔，唔適合亦都大大方方講出嚟。
 
之前我會嬲，都係登蕃薯仔慘，佢咁努力去愛子晴。




 
因為我都相信，努力咁去愛一個人，會有好結果。天真咁認為。
 
但依家諗諗下，兩邊都無話邊個啱邊個錯，只不過要接受，需要時間。
 
睇住佢咁辛苦，咪俾啲時間佢囉，依家嘅佢，只係喺度宣洩自己嘅不甘，同自己想要結果唔同。
 
總有那麼一個人，曾經幻想過同佢一生一世，諗過同佢老咗嘅日子，會仍然對佢咁好；然後低估咗一生一世有幾長，高估咗自己嘅耐性。
 
「你估你堅持到咩？總會有一個盡頭，你玩女都會有個終點，你同子晴之間嘅感情，都會有個終點。」呀詩同蕃薯仔講。
 
「到站，你就要落車㗎啦，如果唔係，架車都一樣唔會行㗎，唔好諗住可以坐回頭車返反過去，其實係一個重新嘅開始。」
 
每次聽到呀詩呢種出人意表嘅說話，我都會覺得有種⋯⋯唔係好了解呀詩嘅諗法，呢啲說話、想法，呀詩從來都無同我提及過。