《我的MK妹同桌》第二季: 159

佢哋咁樣起哄法，我同呀詩只好陪笑，第一次見，真係唔知俾咩反應好。
 
「咁姐係幾耐啊？」有人問。
 
心諗：自己唔識數咩？
 
「差唔多4-5年啦。」呀詩幫我答。
 
「仲要一齊嚟咁Sweet，羨慕死人咩？」個個女仔都著到鬼火咁靚，男嘅都係playboy咁款⋯⋯
 




最重要嘅係，蕃薯仔都係咁。好老實，我唔係幾想出席呢種場合，覺得呢啲唔啱我玩，自己亦唔鍾意同呢類人social，明明平時蕃薯仔都無乜朋友，唔知點解依家可以有成堆酒肉朋友。
 
所以話，要出嚟玩嘅話，總有方法。要玩，實有得你玩，唔會無㗎喎。
 
佢哋又話咩祝我哋呢對新人一杯先，凳都未坐暖就嚟飲酒。
 
然後就一齊玩酒game，抽啤牌啦，由1-K都代表住唔同規矩，全部都同飲酒有關，大家輪住抽。
 
我以為我要保護呀詩，幫輕下佢，照顧下佢咁啦，點知佢仲勁過我⋯⋯
 




咁又係，呀詩不嬲都玩得，由中學開始就已經出嚟同班MK仔癲，上咗U都有同啲fd出去玩，諗諗下，係得我先咁摺。
 
中間有個大杯，抽到K嗰個可以加酒，加幾多，加咩都得，但係最後一個抽到K嘅，就要飲曬佢。
 
考驗人品嘅時候。究竟係咪會自作孽呢啲人？
 
我見到杯嘢都覺得癲，溝溝埋埋實唔少酒⋯⋯如果我飲嘅話，一定仆硬街。
 
成場蕃薯仔都好outgoing，好high，佢呢個樣，根本唔似係我識嘅蕃薯仔，佢都著到好型啊。
 




仲周不時攬住隔離個女仔，搭曬人哋膊頭咁。佢其他朋友唔覺得有咩尷尬，就算見到我哋呢啲新面孔，都對答自如，睇嚟真係出嚟見識人多，知道點樣打破嗰種隔膜。
 
同埋估唔到蕃薯仔啲酒量咁好，飲極都面不改容，輕鬆自如咁同其他人有講有笑。

呢一刻，我覺得我係風水輪流轉嗰個⋯⋯
 
係呢個場合入面，我先係薯仔嗰一個。蕃薯仔已經唔再叫蕃薯仔，而係叫「Eric」，而我飲酒又唔係叻，玩game又唔係叻，又唔識同佢啲朋友social，要扮曬嘢咁溝通。
 
啊！！！！毒撚真係唔應該嚟呢種場合啊！！
 
「哇！你真係唔好彩啦，咁⋯⋯咁都抽到最後一隻K喎！！」後面嗰句，加重咗個音量，搞到依家全世界都聽到。
 
個八婆同我唱通街。
 
呀詩捉住我隻手，我知佢緊張我，但我未去到咁條女幫我頂酒。




 
「點估到會係你啊K仔？」我對住隻K講。
 
其他人嘅笑聲貫徹全場，個個都起曬哄，食花生咁款。
 
佢哋唔會理我死活，最好我飲完之後醉咗添，然後繼續灌其他人。
 
唯獨蕃薯仔同我講：「唔飲得唔好格硬嚟啊。」
 
呢一剎那，我先見返蕃薯仔嗰個善意嘅眼神，我熟悉嘅蕃薯仔。
 
其實佢本質係無變到嘅，係一時迷惘咗姐，我睇得出嘅。
 
「我唔會走數嘅。」我咁樣答佢。
 




之後我好似飲苦茶咁閉上眼，閉埋呼吸，一嘢飲落去。
 
屌⋯⋯個喉嚨好似俾火燒咁，終於知咩叫烈，而且陣味好怪，我真心唔明點解啲人咁鍾意飲酒，難飲到仆街，一飲落去就知好重酒味。
 
我唔急住飲，但唔急嘅話嗰陣味卡係喉嚨好辛苦，但我知太急嘅話，加上又溝酒，我陣間實醉。
 
從來未試過醉嘅我，真係唔知咩體驗。
 
因為我根本唔會飲酒。
 
飲後之後，個個係度歡呼，飲緊嗰陣已經係度叫囂啦，的確⋯⋯咁先似係酒場嘅氣氛。
 
「真男人！」
「一口氣飲曬佢，犀利！」
「好撚型啊！！」




 
飲完之後無咩事，都仲撐到，個意識仲係度，呀詩係隔離關心我：「無事啊嘛？」
 
「無⋯⋯暫時無事掛。」我坐返低。
 
不過，過一排就出事了，我開始感覺到自己嘅意識開始模糊，暈暈地咁囉，我需要用意志力去抗衡，俾自己清醒。
 
後尾，佢哋繼續玩game，但係已經無再理我，呀詩都有俾下面同佢哋玩，呀詩每次飲完酒之後，眼角都會瞄一瞄我，睇下我有無事。
 
我知佢真係好關心我⋯⋯有佢係度，我放心好多，好彩佢話嚟睇住我，的確如佢所講，到時候真係無人理鬼我。
 
可能得返蕃薯仔，但係蕃薯仔有著落嘅話，仲鬼會理我咩？
 
忽然間，呢啲喜愛夜蒲嘅劇情，會出現係我身邊，人生如戲，畢咗業出嚟，真係可以好多變數，你以為唔會發生嘅嘢，都會發生，你以為唔會變嘅嘢，都變緊。
 




原來係我未學識長大，未學識去接受呢一切。