《我的MK妹同桌》第二季: 158

我聽到之後有啲唔係幾相信嘅，咁電視劇，難啲相信呢啲嘢會發生係自己周邊。
 
直至臨除夕嗰陣，佢自己Whatsapp我，問我去唔去飲酒，話個場仲有其他朋友，叫我一齊嚟玩下。不過未到除夕嘅，我就唔洗陪呀詩，但之前蕃薯仔係從來都無問過我呢啲嘢，唔好話佢啦，我自己都無諗過咁樣出去蒲。
 
不過我唔係蕃薯仔，我唔明白佢嘅感受，佢可能需要咁樣放縱先可以舒緩到佢內心嘅不甘。
 
最後，我同呀詩講咗。
 
「洗唔洗我陪你去啊？」呀詩喺電話裡頭問我。
 




「下？唔洗啦⋯⋯你去咗嘅話，我同蕃薯仔傾偈都無咁盡興啦，男人嘅對話，女人插落嚟好容易火遮眼。」
 
「我淨係擔心你飲到貓咗，無人係你隔離姐，你覺得蕃薯仔會睇住你咩？佢都講到佢個場有佢啲朋友，佢同啲朋友玩到癲曬，邊得閒理你啊？你到時候盞癱屍咁癱係度。」
 
「你又啱嘅，但你真係嚟？」我問多次。
 
「嚟啊，唔睇實你點得啊？唔通俾你亂嚟啊？」呀詩個語氣充滿要脅。
 
「我會點亂嚟啊？」我無奈咁係度笑。
 




「點知你會唔會酒後亂性㗎？又或者去溝其他女㗎？」無啦啦佢好緊張我咁，搞到我個心甜一甜。
 
「有你仲洗乜去溝女啊？」
 
我哋又係度講埋啲無聊嘢，咁我同蕃薯仔講呀詩都嚟，佢話無咩所謂，最緊要人多好玩。
 
蕃薯仔連講嘢嘅語氣都輕挑咗好多，佢呢下轉變令我有啲摸唔著佢諗緊啲咩。
 
去到佢個場，同普通酒吧嘅格局差唔多，但光線多咗好多，五顏六色咁，入面都幾多人下，我同呀詩都搵唔到蕃薯仔係邊。
 




係好入面嘅包廂度終於見到佢，不過係佢見到我哋先。
 
「Hello~~~~你哋咁遲先嚟㗎？過嚟坐啊。」蕃薯仔係人堆中央起身招呼我哋，然後介紹我哋俾其他人識⋯⋯個感覺⋯⋯好唔自在。
 
「Eric啊，佢哋就係你講一齊咗好耐嘅情侶啊？」入面其中一個男仔問道。
 
「係啊，由中三一齊到依家。」睇嚟佢口中叫嗰個Eric，係蕃薯仔。
 
「哇⋯⋯」在場嘅男男女女都紛紛驚嘆，「一齊咗好耐喎咁！」