《我的MK妹同桌》第二季: 154

我同呀詩係澳門影咗好多相，多到我執都執唔曬。我已經唔知仲可以影到咩角度啦，但呀詩仍然唔滿足。
 
「你睇下⋯⋯後面咁多人。」我無言以對，明明冬天嚟，我都影到出曬汗。
 
呀詩係靚嘅的確，有幾張我覺得影得佢幾靚啊⋯⋯但係佢偏偏唔收貨。
 
係大三巴後面，有個戀愛巷，多人到輪咗好耐，期間我哋都有影啲情侶相，將來呢啲相就係成為wall paper嘅材料嚟。
 
跟住同佢去食啲街邊嘢，行程呢家嘢，都係我做咋嘛，佢負責審視呢啲嘢啱唔啱，滿唔滿意。
 




佢有講過話唔想食咩西多士之類，ban咗我個idea。
 
夜晚呢，就book咗間葡國餐廳，算係食大餐啦，啲嘢食上齊後，擺好位之後，就梗係相機食先㗎啦。
 
基本上，呢啲都係近排港女必做嘅步驟嚟，呀詩由MK妹進步到成為一名港女。又唔可以話係進步嘅，只不過係由一種流行嘅風格，轉另一種風格姐。
 
幫佢影好相，佢擺好曬post之後，佢話開餐先可以開餐⋯⋯
 
佢要先審查啲相先食得，我好似個太監⋯⋯
 




相入面嘅呀詩，著件一字膊嘅白色衫，短裙仔，好性感，呢種知性美同過往唔同，我望住佢經歷完旺角嘅MK look，再到啱啱一齊返嘅清統look，最後呢幾年慢慢轉變嘅性感look。
 
唔同時期嘅佢，我都有份參與。
 
我哋食飯無乜話特別要搵話題，啱先講，唔啱嘅話，呀詩就會玩電話，而我好少會邊食邊玩電話，我會望住佢，靜靜地諗下嘢。
 
呢種隨心所欲嘅相處模式，唔知幾時開始大家都默認咗咁樣，久而久之就習慣咗。
 
就算今日係平安夜，一年咁特別嘅日子，都可以特別得嚟，唔算太特別，個感覺唔識點形容。
 




好似呢種日子，隨時搵一日咁過就得，只要個對象係呀詩就可以。
 
同埋呀詩係會專登打扮，呢一日嘅佢係比平時更加靚，你會察覺到更多嘅唔同。
 
飯後，就行下有別於香港嘅聖誕，不過就無乜太大期待罷了。
 
澳門真係細，行嚟行去都係嗰啲位，最後行下行下返返嚟大三巴，係個廣場度有架雪糕車。
 
「哇！澳門都有雪糕車喎。」呀詩好驚訝咁講，我真係唔好知好嬲定好笑。
 
「澳門有雪糕車有幾出奇啊？你以為淨係得香港有啊？」條友嚟搞笑。
 
「哇！！我要食⋯⋯」呢個細路仔嘅樣，就好似中學嗰年聖誕節咁，冬天係咁嘈住話要食雪糕。
 
呢啲回憶，係我哋兩個。




 
「你啱啱先話好飽，依家又要食雪糕？」
 
「女人有第二個胃㗎嘛！」
 
買完，佢食咗兩啖之後，就話飽唔食⋯⋯要我食曬佢。