《我的MK妹同桌》第二季: 153

聖誕節，我哋真係臨尾先決定點樣過，雖然話就話係我諗姐，但我講出嚟，呀詩又話呢樣唔好嗰樣唔好咁。
 
女人真係好麻煩，呢個係我拍拖咁多人得出嚟嘅結論。
 
幾經辛苦，我哋先決定話過澳門玩返兩日一夜。
 
旅行，真係考驗情侶嘅一環，相處得好唔好，就係睇呢個時候。
 
「就嚟開船啦，依家先到。」我焦急咁係港澳碼頭度等呀詩嚟到，見佢拎住一袋二袋，就唔怪佢啦。
 




「瞓過龍啊，唔知點解個鬧鐘都無響到⋯⋯」呀詩向我抱怨，我哋雞手鴨腳咁上船。
 
上到船我哋整理下自己啲嘢，講唔出嘅狼狽。
 
「嗱！我都知今日唔會有時間食早餐㗎啦，所以頭先係下面買咗個M記包俾你，你依家食少少嘢頂下肚，然後瞓陣，落船就去搵嘢食啦。」我遞咗個M記袋俾呀詩。
 
呢條友仔琴晚同我講佢同佢啲roommate打麻雀⋯⋯所以我都估到今日佢實起唔到身㗎啦，唉。
 
「哇！多謝你啊強b！點解我男朋友咁貼心嘅？又咁勁估到我哋真係食唔切早餐嘅？」先前仲實牙實齒可以出發前係附近食個早餐，依家真係食條撚。
 




落船之後，搵酒店擺低啲嘢，就周圍去行下，搵嘢食。
 
估唔到澳門都咁多聖節氣氛，周圍都係啲聖誕嘅佈置啊同埋燈飾。
 
「依家好似我哋兩個渡緊蜜月咁啊，你覺唔覺啊？」我同呀詩行緊去大三巴，呀詩撓住我隻手，臉上洋溢住幸福嘅笑容。
 
呢排，呀詩有意無意咁提起結婚有關嘅嘢，我唔係唔知佢嘅用意⋯⋯只不過有陣時可以唔洗咁。
 
「傻啦，真係渡蜜月嘅話，唔會同你嚟澳門啦，唔驚你殺咗我咩？」我自嘲。
 




自嘲永遠係自保最好嘅方法之一。
 
「算你啦！」呀詩滿意兼得戚地說。
 
「實會同你去轉法國，行巴黎鐵塔，夠曬浪漫啦掛？」呢一刻嘅承諾，唔敢作咁大，只怕係一顆一閃即逝嘅流星。
 
動人，但殘忍。
 
「你係先好！」
 
「係喎，澳門呢度都有巴黎人喎，頂住檔先囉？哈哈哈⋯⋯」我自以風趣。
 
「去死啦你！賤強！」