《我的MK妹同桌》第二季: 155

我哋好多行完，行到攰就返酒店，我哋揀中呢間價錢適中，但係幾高質，入到去間房覺得幾正，短短地一個trip，對我哋嚟講幾好。
 
我哋係酒店攤陣，好鬼攰，我哋就咁係度各自玩自己嘅手機，開住酒店嘅電視機聲，等個環境有返啲聲音。
 
我悶到係度打機，呢排手機出咗款類似LOL嘅手機版，叫夢三國，打機嘅模式都開始轉。
 
我好快手打完幾鋪⋯⋯機，碌下ig嘅時候，就見到呀詩出咗post，係佢今日影嘅相，後面都有我同佢嘅合照。
 
唔知由幾時開始，呀詩會好俾心機經營佢個ig，㩒入去佢個ig，會見到個排版風格好統一，相入面嘅佢全部都好靚，連啲色都係有配過咁，好明顯睇得出呢個唔係iphone原本有嘅色。
 




佢ig嘅follower直線上升，佢係較咗public㗎。
 
係我打緊機嘅話，呀詩就好努力咁執緊啲相，然後出post，個post已經無再好似以前咁打水蛇春咁長嘅句子，而係通常都係短短幾行，或者一句就收筆。
 
忽然間由散文轉咗去新詩。
 
重點係⋯⋯佢無tag我，我無通知出嚟。
 
「你出post都出得幾快喎？」我轉下轉下個身，然後瞓落呀詩大脾度，我哋依家兩個人成一個「L」形狀。我抬起頭就望到佢低頭望手機嘅樣，呢個角度嘅佢，好靚，但佢啲頭髮垂直落嚟整到我個頭，我將佢啲頭髮撥去後面。
 




「好多人都出post啦，依家成個ig係度洗版。」我諗佢指嘅好多人，係指佢大學嗰班吧？
 
「你做咩唔tag我嘅？」我問。
 
「啊⋯⋯我唔知後面嘅相點樣tag啊。」
 
我教完佢之後，佢用好神奇嘅眼光望住我，做咩嘢啊條友？
 
「咁勁嘅？點做到㗎？我頭先研究咗好多都唔識整。」一開頭我懷疑佢派膠，但佢似真心膠。
 




「下？呢個好簡單咋喎。」我繼續膝枕。
 
「你好叻啊～～～」呀詩嗲我，然後玩我塊面。
 
然後係呢個角度錫上嚟，唔係無試過，但依家係酒店嘅催情下，無錯！酒店個環境就係催情，要人扑嘢。
 
諗住開始前戲，點知呀詩就截停咗我。
 
「今日我好攰啊⋯⋯琴日已經唔夠瞓啦，我今日無力搞嘢。」呀詩嘅疲態出曬嚟。