《我的MK妹同桌》第二季: 152

「哼！早啲諗定唔得㗎咩？你有無幻想過我哋真係結婚之後嘅樣啊？」呀詩悠然自得咁捉緊我隻手。
 
「點會無？我幻想過我哋可以一齊住，瞓醒嘅時候可以望到你，可以同你嚟個晨早Q，再整埋早餐俾你食，先出去返工，淨係諗下都覺得幸福。」我滔滔不絕咁講我腦海中幻想嘅美好，但我望一望呀詩，見佢無乜反應。
 
於是問：「做咩啊？你唔想咁咩？」
 
「想，但係結婚唔會淨係得咁⋯⋯」佢講。
 
「結婚就係好多現實，好多殘酷嘅嘢，我同你諗法唔同嘅係⋯⋯你會係想結婚係件好事，好幸福咁，而我嘅諗法係，就算結婚之後，人生之後嘅時間幾苦都好，至少都有你。」聽完之後，我真係唔識點回應，呢種感覺唔止一次，每次呀詩講嘅嘢都會令我眼都凸埋。
 




「我好想要個家⋯⋯我前半生已經無㗎啦，我想我之後嘅日子，可以有個屋企，有個家俾我依靠。」
 
「尤其是呢段時間住hall，我更加想啊⋯⋯係hall入面，好彩我遇到啲好好嘅朋友，大家都玩得埋，我第一次感受到屋企嘅感覺，我可以好放心咁去依靠呢個地方。」
 
「當然，有啲真係好亂嘅，開曬眼界。」
 
「所以我想我哋之後都可以有個屋企⋯⋯屬於我哋嘅屋企。」
 
「當然可以啦，我都努力緊，我哋最後嘅目標唔係都係呢樣咩？但⋯⋯但係依家對我哋嚟講，真係太早啦。」
 




「我知，我只係想知你有無呢個心姐，如果⋯⋯」呀詩停頓了一下，再道：「如果你無咁樣諗嘅話，我就會離開。」
 
呀詩咬著下唇，又以溫柔無比嘅殺傷力同我講。
 
呢件事深深咁刻係我心入面，我知呀詩最想要啲咩，時刻提醒住我，我想做一個可以背負起呀詩嘅男人。