《我的MK妹同桌》第二季: 151

呢陣間，係我哋呢段時間難得嘅甜蜜。
 
最後我亦都嬲完，返去嗰陣冷靜返，就會知呀詩講嘅其實係啱，可能只不過係當下唔想承認罷了。
 
即使依家平安無事，但係我有啲感覺到，我同呀詩嘅關係，慢慢有啲轉變。
 
一個月又一個月，時間好快過，你問話經歷咗啲咩嘅話，其實又無乜咁特別，個個都衝緊啲成績，唔似得大學咁多嘢玩。
 
呀詩嘅大學生活幾多姿多彩，佢住hall嗰度識咗啲fd，後尾又換到房，成日好似開party咁，呢個學期佢啲堂排得好靚，佢不嬲都係嗰啲玩還玩，功課啊成績嗰啲實會顧得掂嘅人嚟。
 




聽佢講，佢以前屋企無人理佢，又唔會有咩補習，所以自己唔理嘅話，就無人會理你。
 
而我就不停咁樣去趕gpa，就係唔明點解啲人可以輕輕鬆鬆咁過3爆4，而我就讀到死下死下咁。
 
鬼叫我以前懶，唔讀書咩，再係咁落去，上唔到大學就前功盡廢㗎啦。
 
「今年聖誕有咩搞啊？」呀詩依偎係我心口度，我哋咁啱係尖沙咀食完飯，行下個尖沙咀海旁。
 
「唔知啊，你有無咩想做啊？」我反問返佢。
 




「中學嗰陣，唔記得聖誕定係倒數，你條友係咁多人面前鳩嗌⋯⋯真係笑鬼死我，哈哈哈！」
 
「唔準笑啊！！」呀詩臉上泛起紅暈，用力咁打我。
 
「依家先知道柒啊？」
 
「以家唔會再咁做㗎啦，以前真係癲嘅。」
 
「咁你聖誕有無咩特別想做啊？」
 




「乜呢啲嘢唔係男仔諗嘅咩？」秋天稍稍來臨，次次都係嚟得不知不覺咁，涼天吹落衣著單薄嘅我哋。
 
呀詩凍到震曬，我兩隻手攬實呀詩，不停咁摩擦佢身體，希望佢暖和啲。
 
「都一齊咁耐啦，仲要男仔俾驚喜啊？」我笑笑口咁問。
 
「一齊耐咗就唔洗啦？咁之後結婚點算啊？」第一次，係我哋口中嘅對話入面，出現結婚呢兩隻字。
 
「咁都未咁快結婚姐⋯⋯依家先year2咋喎，哈哈。」為免尷尬，我用講笑嘅口吻講。
 
「諗得嚟都差唔多啦，除非你無諗住同我結婚姐。」哇，佢咁講⋯⋯即刻死狗咁。
 
「唔係⋯⋯點會唔想姐？只不過，會唔會太早？」點解會扯到咁遠？