《我的MK妹同桌》第二季: 150

「你有無幫下啊蕃薯仔啊？」我認真問。
 
「無啊，我淨係聽下子晴點講咋，佢哋兩個嘅事，我唔想干預太多。」
 
我無出聲，低頭食飯，都無任何表情。
 
我嬲嬲地，覺得點解唔幫下蕃薯仔姐？我知唔係話幫就一定幫到，但幫下，試下，有呢個心都好啊。
 
呀詩過咗一排，轉下其他話題，見我都無咩回應，都知我嬲緊。
 




「就算你係度嬲，對件事都無咩幫助，就算我去幫，最後點決定都係佢哋之間嘅事。」呀詩苦心婆心咁同我講。
 
我仍然都無理到佢。
 
通常都係我激嬲呀詩，然後我要去氹返佢，真係甚少我會嬲同發脾氣⋯⋯
 
但我清楚，通常呢啲平時好少嬲，好少發脾氣嘅人，一發起上嚟，係好難收科的。
 
我就係呢種人。
 




呀詩想安慰我，但我道氣始終都係谷住谷住，我仍然為蕃薯仔感到不忿。
 
雖然我都仲嬲緊，但係我都堅持送呀詩返去。
 
一路上，我都冷冰冰咁。
 
就嚟送到佢返hall嗰陣，呀詩係咁氹我，慢慢⋯⋯我個心開始軟，開始溶化。
 
我就係又硬頸，又容易耳仔軟嘅男人。
 




記得中學嗰陣，呀詩話俾我執返劑，我即刻龍精虎猛！
 
但依家呢招已經無效了。
 
「唔好嬲啦～～我錫返啦好無？」呀詩不停咁係我臉上打印。
 
「你唔嬲嘅話，我俾你做乜都得。」呀詩輕輕咁係我耳邊講。
 
我已經無乜點嬲，但我仍然係度扮高竇。
 
我見到呀詩為咗氹我，真係好落力，其實我知道理係呀詩度，我只不過係固執地係度發全世界脾氣，但呀詩佢仍然選擇放下身段咁氹我⋯⋯
 
就係呢種感覺。
 
感覺就係呢個女仔，可以陪我行埋人生後面段路。




 
「仲未嬲完啊？咁小氣嘅咩你？」佢突然拉我去咗個偏僻位，呢個公園燈光唔多，所以好多情侶都會係度拍拖，恩愛。
 
呀詩攬住我，拍係我心口度，佢個心口壓住我個心口，我感受到佢心口之巨大。
 
「嬲完就咪扮曬嘢喎！」呀詩抬頭望上嚟，用對水汪汪嘅雙眸穿透我成個人，月色混淆埋燈色，幫呀詩清純無化妝嘅臉容打燈。
 
我即刻，係即刻！向呀詩嘅櫻桃小嘴吻去。