《我的MK妹同桌》第二季: 149

「佢似乎諗得好清楚啦，佢話呢啲嘢好難改變，就算蕃薯仔真係改變咗，都已經唔再係以前當初佢鍾意上嘅蕃薯仔。」呀詩平靜咁講返出嚟，期間無任何覺得可惜。
 
唔知點解，我就有點無名火起。
 
「蕃薯仔佢真係好愛子晴，佢亦都為咗子晴改變咗好多嘢，放棄咗好多嘢，點解可以分得咁狠？」我認真到有啲嬲。
 
「唔分手嘅話，對蕃薯仔嚟講，仲狠。」呀詩講呢句嗰陣，無帶任何情緒。
 
「要改變都要有個過程，其實知唔知咁樣對蕃薯仔嚟講，係件好難，同埋係好大突破嚟？」我登蕃薯仔唔抵，搞到有啲激動。
 




「所以子晴先唔想咁，兩個人要一齊，就係要舒舒服服咁做自己咋嘛，要改呢樣改嗰樣，最後變到唔似自己咁，而且段關係亦都變得唔再舒適，變成一種煎熬，有咩謂呢？」
 
「但係見到住佢咁，真係唔知佢做錯啲咩，佢只不過簡單咁鍾意一個人，甚至為子晴付出曬所有嘢，點解會有咁嘅下場，我真係唔明。」成件事好似好簡單咁，但我真係諗唔明。
 
「老土咁講，愛情乜有分對同錯嘅咩？」
 
「我知係無⋯⋯所以先⋯⋯」我語塞，我諗唔通。
 
「我知你點解會咁唔忿氣，亦知你因為朋友先咁嬲。」呀詩安撫我，佢到呢一刻都好平靜，自從上咗高form，呀詩慢慢唔再係MK妹嘅時候，佢就一路都成熟過我⋯⋯
 




「我唔想講啲咩愛情大道理，其實唔洗諗得太複雜，子晴佢係喊住咁同我講佢同蕃薯仔啲嘢，係呢段關係入面，無必要分邊個抵邊個唔抵，你唔會清楚得曬咁多，佢哋段關係無背叛，只係到一個位，大家都行唔到落去咋嘛。」