《我的MK妹同桌》第二季: 148

「我真係好愛子晴⋯⋯為咗佢我每日都好努力，好努力做好佢心目中完美嗰一個⋯⋯所以嗰陣時子晴要溫書，要retake嗰陣，我都盡量陪住佢，唔打擾佢，想佢可以專心溫書，拎返自己之前失去嘅嘢。」每一句說話，蕃薯仔都會參雜一啖苦澀難嚥嘅ice啤酒。
 
「但係換嚟嘅，就係佢嫌我悶！無感覺！」
 
「所有女人都係雞嚟！！！！」佢鳩叫。
 
「嗱，呀詩唔係啊⋯⋯」我強調。
 
「屌⋯⋯你⋯⋯嘔嘔嘔⋯⋯嘔嘔⋯」都未講埋後面嗰兩隻字，就嘔咗啦。
 




蕃薯仔嘔完之後，明顯個人無咁醉，清醒好多。
 
「點解你知道咗，但唔同我講？」蕃薯仔認真咁問。
 
「嗰陣時同你講，你個心會舒服啲咩？」我反問佢。
 
「我走你同你講，你就要選擇，甚至乎會俾你覺得，我係離間你哋感情嗰一個，呢啲咁吃力不討好嘅事，以前做過，依家就唔會再做。」
 
「你仲記唔記得？當初我啱啱同呀詩一齊無幾耐，你就問我點樣先可以拍到拖，我仲做雞仔媒人撮合你同子晴，年少無知嘅我哋，見住人哋幸福，自己都會開心⋯⋯」
 




「但一手撮合你哋兩個嘅我，見證住你哋由一齊，到散，我就諗點解我要插手入呢件事度？搞到好似我都有份，我都有責任咁，當然⋯⋯我知你哋由頭到尾都無怪過我，甚至一唔一齊，都係你哋嘅抉擇，但參與咗嘅人，註定會有痛苦呢種感受。」
 
「所以，我都唔知點同你講，話你就嚟俾人飛？男人嘛，有啲嘢就應該擺係心，係女人先需要咩都講出嚟姐。」我都拎起罐酒，輕輕敲下蕃薯仔罐啤酒。
 
我飲嘅係Jolly Shandy。
 
我哋係個海旁度，吹住風咁樣飲酒，無再講啲咩，香港地最容易搵嘅就係海旁。
 
男人嘅浪漫，唔洗講咁多嘢，我哋都真係慢慢大個⋯⋯
 




嗰一晚之後，蕃薯仔學識咗食煙。
 
呀詩佢都有同子晴約出嚟傾下偈，佢哋去啲高級地方度食下午茶，嗰啲cake仲貴過啲lunch咁濟。
 
佢有影相俾我，我諗姐係叫我下次帶佢去食呢啲下午茶。
 
「子晴佢點講啊？」之後同呀詩食飯嘅時候，我再問起。