《我的MK妹同桌》第二季: 147

我估唔到子晴會同蕃薯仔係呢個時候散，老土咁講，啲人話中學上大學好易散，大學出嚟社會好易散。
 
初頭唔係好信，天真咁以為只要有心就一齊到落去，會散嘅話只有是但一方唔再鍾意。
 
直到自己都經歷完呢啲階段，發現好多問題，唔係自己控制到，大個咗，唔再係話有愛情就可以解決一切困難。
 
屌！就好似以前睇動畫啲男主角，一句鳩叫，或者熱血就力量提升，打低曬啲對手一樣咋嘛。
 
以前會對呢類漫畫深同感受，自己會想好似入面嘅男主角，保持熱血，保持嗰顆心。
 




但係之後會慢慢發覺呢套根本就唔得，每次熱血完嘅下場，都係一舊屎嚟嘅，所以做事就會經過大腦，而唔係一味靠衝動。
 
佢哋衝動唔累事係因為佢哋係男主角。
 
愛情都係咁，我諗，蕃薯仔同子晴唔單單因為無愛情咁簡單，相處上啦、大家想要嘅方式唔同、性格等等，都係問題嚟。
 
「我為佢已經改咗好多！你睇下，我同我哋班嘅人玩得幾埋？佢覺得我悶，我依家咪唔悶囉！蕃薯仔滿臉通紅，已經唔係微醺嘅狀態。
 
佢出到嚟，都仲係繼續係度飲，我已經同我哋班嘅人講話我哋兩個走先，遲下再出嚟玩過！
 




亦都同呀詩講咗。
 
「下？蕃薯仔佢搞咩啊？」呀詩聽到蕃薯仔飲醉咗係度發酒癲，然後就問咩事。
 
「佢同子晴分咗手。」我無奈地說。
 
「下？？？」呀詩提高幾個音貝，震驚程度都幾大。
 
「點解嘅？」
 




「我晏啲再同你講啦，一係你去問下子晴囉，蕃薯仔呢邊我搞得掂。」
 
之後就收咗線。
 
「點解啊！！！啊啊啊啊！！？？？？」另一邊廂，又有一位人兄問點解。
 
「我知⋯⋯點解你可以為佢改，但佢都仲係同你分手啊嘛？」我道出個問題。
 
諗返起以前分手，個世界都好似蕃薯仔依家咁，崩塌咗落嚟。
 
依家心臟強大咗掛，對於一啲唔夾，無辦法強求嘅事，唔會再好似小朋友咁任情，要強行留係自己身邊，因為自己清楚，個玩具會玩厭，甚至唔會再咁鍾意玩玩具。
 
你哋有無試過細細個玩具嗰陣，扭計話要買玩具，其實屋企已經有個差唔多嘅，只係佢出咗另一款特別少少嘅，就想叫屋企人買。
 
其實屋企嗰個差唔多厭，但以前曾經某段時刻好鍾意好鍾意玩，所以想買個差唔多嘅返去，繼續想去返以前好鍾意好鍾意嘅階段。




 
無諗過嘅係，買完返去，比以前更加快厭。
 
或者係一份執著，有啲時刻，喺屬於以前就係以前，就算搵個類似嘅替代品，都搵唔返。
 
執著完，一切就會淡。