《我的MK妹同桌》第二季: 146

蕃薯仔成個look俾人嘅感覺唔同曬⋯⋯點講呢，好似係識打扮咗，個人有型咗，你真係好難想像到佢以前中三、中四嗰陣個蕃頭樣，你依家同其他人講佢以前好毒，真係講都無人信。
 
「哇，搞咩嚟啊？遲到！陪女神啊？」呀Ken個音量長期都係所有人都聽到嘅音量嚟。
 
「唔係啊。」蕃薯仔get到呀Ken想問啲咩，靦腆一笑。
 
「靚仔咗喎蕃薯仔！」啲女係咁眼甘甘咁望住佢，啲眼睫毛係咁眨嚟眨去，發曬姣咁。
 
「係囉，無見咁耐，型仔曬喎。」
 




本來佢中四暑假之後，佢飆高咗之後，就已經成個人脫胎換骨，依家更甚。
 
蕃薯仔好自然咁行過嚟坐我隔離。
 
「好耐無見喎。」我潤一潤佢。
 
「都真係幾耐嘅。」蕃薯仔真誠咁對住我笑。
 
「你知嘅咩？你條友重色輕友！眼入面無朋友㗎啦你⋯⋯」我講笑。
 




真係fd嘅話，隔一排無見，都仍然係咁fd。
 
「無啦⋯⋯以後都唔會重色輕友啦。」蕃薯仔皮笑肉不笑咁同我講，唔難睇得出佢個樣係認真嘅。
 
但我都係好戇鳩咁問咗：「認真㗎？」
 
我的確係呆一呆，愕然咁望住佢，估唔到事出咁突然，而且我仲要係知情嗰個嚟，忽然有種唔知點面對佢嘅感覺。
 
子晴之前先話無諗住散㗎？依家忽然又轉軚？
 




「係啊，早兩日嘅事。」蕃薯仔壓低聲線。
 
「咁大件事唔同我講？好地地點解會咁㗎？」我都細聲講，而且佢仲要揀呢啲場合同我講，難怪頭先入嚟嗰陣無乜笑容，成個人有少少憂鬱咁。
 
「我都唔知。」坦白講，我好耐無見過蕃薯仔咁sad了，就算中學嗰陣，都無依家咁sad。

「佢點同你講㗎？」於是我問。
 
「佢話我哋感覺淡咗，佢唔係第一日察覺到呢個問題，佢有試過繼續一齊落去，但最後都覺得再咁落去唔係辦法⋯⋯」
 
「佢最後同我講，原來有啲嘢去到真係無辦法落去啦，感覺再繼續落去只會越嚟越差嘅時候，就會分手。」
 
「佢話，就好似肥咁，當你見住自己越嚟越肥，到自己頂唔順嘅時候，就會走去減，你一日未去到嗰個位，你都未識停。」
 
「當佢咁樣同我講嗰陣，我完全唔知講咩好⋯⋯」




 
「乜我同佢，真係去到咁嚴重咩？」蕃薯仔捉亂曬自己頭髮，我知佢努力想控制自己嘅表情，但係睇嚟佢做唔到，都係出賣咗佢。
 
「其實你呢個問題，子晴有同我講過⋯⋯」後面嗰句，我講得小心翼翼，膽戰心驚。
 
「吓？」蕃薯仔首先成個人停頓咗一下，然後繼續問：「佢同你講咗啲咩啊？」
 
我將嗰晚嘅事同曬佢講。
 
「我以為呢段時間一路陪係佢身邊就夠，佢重考嗰一年，我真係唔想打擾佢，我都想可以正正常常咁拍拖，難得佢考完，之後啲時間多返曬啦，我哋一齊出去拍拖，做咗好多sweet嘅嘢，我以為咁樣就會Okay，點知無啦啦又⋯⋯」
 
「其實我feel到，我feel到子晴對我係點，但我以為考完之後就無嘢，事實我同佢嗰段時間都真係好開心，我點估到⋯⋯我真係對愛情無信心啦。」
 
呢個角落，同出面狂歡緊嘅世界形成一個好強烈嘅對比。
 




「一係依家換個地方傾下？」同中學時期一樣，我都做咗安慰蕃薯仔嘅角色，做乜我成日都要做感情輔導員？
 
蕃薯仔搖搖頭。
 
「真係？呢條傾唔到啲咩喎。」我道。
 
「我呢啲度就係想玩下，等我唔洗再諗子晴啲嘢，等完之後再講都未遲。」蕃薯仔抖擻精神，重新振作！整理下髮型，又一條好漢。
 
「你又有道理喎！嚟，去玩盡佢！」我支持佢啊，玩完先再諗嘛。
 
蕃薯仔企起身，行埋去人群度，望住佢背影，有點基基地⋯⋯
 
死啦，佢會唔會因為咁樣搞基㗎？
 
我黑心咁諗⋯⋯啲基佬好冧呢一type㗎喎。