《我的MK妹同桌》第二季: 145

「係啊，唔得咩？」我反問。
 
「得！只不過估唔到你哋咁耐姐，痴心情長劍。」個八婆叫Mary。
 
「係喎，你哋一齊咗幾耐啊？」其他人紛紛係度問，一個二個個眼神都充滿住八卦！
 
「差唔多4年？好似唔夠，3年幾啦。」我如實咁講。
 
「哇！！都幾耐喎。」眾人一臉不可思議咁嘅樣，可能對佢哋嚟講，未試過拍咁長拖掛？
 




「咩啊，蕃薯仔同啊子晴都差唔多耐啦⋯⋯」我反駁。
 
「係喎，佢哋都好似由中學拍到依家喎？」
 
「係呢，子晴佢依家點啊？聽講佢之前好似repeat咗一年喎。」
 
中同聚會，無非都係知下其他人嘅去向，睇下人哋死得未，但查實呢啲嘢係唔關自己事。
 
「係啊，聽講最後入返U。」有人代咗我答。
 




「蕃薯仔咪好囉！食到女神。」就咁聞啊，都聞到男仔把口陣酸味啊。
 
「咁蕃薯仔都幾好喎，人哋repeat都陪住人，咁都捱得過。」打麻雀班女仔搭話。
 
「係囉，啲人話中學拍拖嘅都唔會長，估唔到佢哋拍到依家，真心勁！」
 
「西！」個女仔打咗個西出嚟之後，就俾人食咗了。
 
「六番啊！」佢哋已經熟曬，而我對麻雀一竅不通。
 




「係呢強仔，你有無諗過結婚啊？」把口未停過嘅八婆係咁問我⋯⋯
 
「係囉，咪好似方力申同鄧麗欣咁啊，拍咁耐，真係唔結就分。」
 
鮮有地諗起「結婚」呢兩隻字，對我嚟講仲好長遠，好長遠。
 
「痴線，咁撚早咩？十劃都未有一撇啦，又未出嚟做嘢，錢都未有得儲，無錢點結婚啊？」對依家嘅我嚟講，結婚真係我從未想像過嘅事。
 
但你問我，我係會想同呀詩結婚，同佢婚後嘅生活都⋯⋯都幾美好啊？
 
我個腦開始築起同呀詩結婚後嘅影像。
 
「幾年好快過咋，你哋都拍得唔算短啦，慢慢諗下其實差唔多㗎⋯⋯㗎啦，碰啊！碰⋯⋯話咗碰囉，仲睇牌？」
 
呢次佢又講得幾有道理。




 
唱緊K嘅一啲人仲係度講緊蕃薯仔，我走埋去聽下啦，都係講緊類似嘅嘢，之後蕃薯仔就嚟到啦⋯⋯
 
所有人都係嘩然，然後又有人講咩「日頭唔好講人」、「一講曹操」之類嘅對白，幾乎每次都會係咁，咁我咪笑下囉，哈哈哈。
 
「主角終於都到啦！」我和應。