《我的MK妹同桌》第二季: 144

我哋唱完忘川之後，點咗好多以前中學唱K聚會會唱嘅歌，幾乎首首都識唱，個個都係度爭咪⋯⋯
 
「我識我識！」
「喂！呢首我嗌㗎。」
「你啊～～女仔都唔讓㗎！」
 
我都好耐無見過咁樣嘅場面，自從離開咗中學之後，無論嗰陣時嘅經歷係好定係唔好，呢種熱鬧嘅場面只係會買少見少。
 
係課堂入面上堂嘅，唔係真係一個「班」，只係一個中轉站。
 




《天梯》、《夠鐘》、《那誰》、《恥恥於懷》、方力申同鄧麗欣嘅歌：《好好戀愛》、《好心好報》、《我的最愛》、《七年》、《十分．愛》
 
「我們分開～～怎麼始終行不開
想捉緊當日精彩～～」
 
呀Ken係度唱得起慶，側邊又有個幾ok嘅，又幾玩得嘅女仔陪佢唱，佢唱方力申，個女仔唱鄧麗欣。
 
「或是害怕完全淡出你那份愛～～」
 
基本上依家都無人理唱得好唔好聽，識唱就會係隔嚟唱埋。




 
而且嗰個女仔叫Iris，之前都唔知佢英文名，都係叫佢兩隻字，後尾好多都淨係叫英文名⋯⋯
 
得返少數會Keep住叫花名嘅，好似蕃薯仔咁，通常先比較熟。
 
講起蕃薯仔，佢遲嚟。
 
我正奇怪點解今日無蕃薯仔嘅？雖則一段時間無聯絡，但佢平時都會出席呢啲聚會，我心係有啲覺得唔係幾好意思，唔應該同蕃薯仔咁耐無聯絡。
 
要斷聯絡，其實唔難。




 
「唉，點估到方力申同鄧麗欣都會散啊？」打麻雀班友講起。
 
好多入大學嘅，都學識咗打麻雀。
 
「係囉，佢哋都好耐㗎嘛。」
 
「十年啦，真係唔結就分⋯⋯」
 
呢一年，方力申同埋鄧麗欣呢對金童玉女都宣布分手，宣告一個嘅時代嘅終結。
 
以前好多人都話佢哋兩個好襯，鄧麗欣仲係我哋男仔一眾嘅女神，佢清純嘅樣真係好正，羨慕死方力申條賓周。
 
大家都以前佢哋會結婚，點知都係收皮⋯⋯不過係人都知方力申玩開女，今次鄧麗欣終於忍唔住掛？
 




話題隨即轉落嚟我度。
 
「係喎，強仔！你同隔離班嗰個咩詩，仲一齊緊啊？」有個八婆問道。