《我的MK妹同桌》第二季: 138

呢一吻無第一次嗰種刺激，至少我依家唔會因為咁樣而有生理反應，就算我心入面好唔想承認，不斷想做好多嘢喚醒我哋以前嗰種激情。
 
依家我先徹底明白，就算幾愛一個人都好，都係會去到呢一個階段，嗰種成年人口中所講嘅⋯⋯變成親情咁。
 
聽就聽得多，真正體會嘅又有幾何？
 
並唔係無咗愛係度，愛一直都在，只係少咗激情，少咗怦然心動嘅感覺，如果唔係對呀詩仍然有種渴望係度，真係好容易會誤以為對呀詩無曬感覺。
 
好多愛情片入面，都係呢個位衰咗。
 




「我唔想你係呢段關係入面感到委屈⋯⋯」呀詩離開了嘅嘴唇，直視住我，幽幽咁講。
 
我意識到呀詩接下來想講啲咩，我即刻講：「我唔覺得呢啲係咩委屈，我心甘情願為你做咁多嘢，係因為你值得我咁樣做，並唔係違背自己意願喎。」
 
呀詩立即攬住我，都幾用力，講話：「我只係唔想見到你辛苦姐，我知你好愛我，亦因為上次分⋯⋯」
 
呀詩未講完，就差啲整跌自己，因為個電梯已經到頂，佢背住個電梯無為意到。
 
我一手托住佢條腰，扶住佢先拎返個平衡。
 




「你頭先講咩啊？」最後我聽得唔清楚。
 
「我係話⋯⋯我知你因為上一次分手，你覺得自己有好多位做得唔好，一齊耐咗之後，你慢慢無理我感受，唔想再好似以前咁，miss咗我任何一次需要你嘅機會。」
 
「我之前都驚過，我哋分咗手之後再一齊返，會唔會一樣都會有條刺⋯⋯好馬不吃回頭草，我同呀彥分手之後我都同自己講過，我拍拖嘅話，散咗一定唔會返轉頭。」
 
我估唔到呀詩會認真到拎返咁耐以前嘅事嚟講。
 
「但係你真係唔同，中間嗰段時間我以為自己可以斬得斷，點知原來自己一直係度十五十六緊。」我哋又再搭上去，搭完上去又再搭返落嚟，不停咁游𨋢河。
 




「一齊返之後我又唔覺得我哋之間有條刺，反而一切順利咗好多，我都安心咗好多，呀強你都成熟咗，大個仔咗，同時間我都知自己要向前行，唔可以俾自己好似以前咁MK落去。」
 
「但慢慢地，我覺得我反而做得唔夠多，反而係我忽視咗你感受，好諷刺。」
 
「我真係唔需要你做幾多幾多，我只不過係想維持我哋初頭嘅感覺，但原來只係我太天真姐。」我都開始明，係我自己太執著以前美好嘅光景。
 
一邊掛住以前，浪費緊現在，又擔心未來。