《我的MK妹同桌》第二季: 132

最後無講到，我打算送呀詩返去抖。
 
「我今晚唔返hall啦。」呀詩忽然同我講。
 
「下？點解嘅？」
 
「我老豆返咗大陸，佢返大陸都係去滾咋嘛⋯⋯」呀詩通常可以唔返去都唔返嘅，我都好耐無上過去呀詩屋企。
 
「咁你今晚可唔可以嚟陪我？」呀詩嫵媚動人咁靠近我，佢請我食波餅嘅意思已經好明顯啦！
 




哇！我哋都好耐無恩愛恩愛下啦，幾句話已經令我成個人振奮起嚟，好快咁答佢：「好啊！」
 
我哋今日返去熟悉嘅區，好似電影入面，既熟悉又陌生，行過嘅街都係我哋中學拍拖時一定會行過嘅地方啦，前面拖住手嘅情侶就好似我哋以前嘅影子咁。
 
呢排我哋拍拖都係去啲近佢嘅地方，或者係旺角，返嚟港島都好少，始終過海貴。
 
突然有啲感觸。
 
依家嘅我，呢啲情緒習慣自己一個人消化。
 




「好耐無同你返嚟呢度啦。」呀詩行返嚟佢屋企樓下嘅時候，忽然開口同我講。
 
「我對呢度嘅回憶，全部都係得我同你，你嗰陣成日送我返嚟，仲俾我拉咗上嚟我屋企，仲有部呢部手機，都係你喺度送俾我，用下用下已經好幾年，依家都出到6，就嚟出6s添。」呀詩無頭先咁攰，但聲線明顯有心無力。
 
「掛住我啊？」我學佢嘅語氣。
 
依家我反而有種可以唔洗再傾嘅錯覺。
 
「無喎！」呀詩撒嬌咁講，我知佢係喺度口不對心，但今日我想佢親口講出嗰兩個字。
 




「真係？」
 
「係啊！」呀詩股起雙頰，漲卜卜咁好可愛。
 
「咁唔掛住我就算囉，返去啦我。」我諗盡辦法想套佢話。
 
我扮轉身返去，即刻呃到呀詩用力咁拉住我隻手，本身佢撓住我，無用力，依家好明顯感覺到佢用力拉扯住我。
 
「你⋯⋯試⋯⋯下？」呀詩表情倔強。
 
「但你話唔掛住喎？」我喺心裡面竊笑著，偷偷地暗爽。
 
「咁⋯你依家掛唔掛住我？」難得地見到呀詩臉上閃過一絲羞澀。
 
原來就算拍耐咗拖，都一樣可以搵返屬於以前、亦係我哋獨有嘅感覺，兩個人有心就做到。




 
「掛⋯⋯」
 
「掛咩啊？」我咄咄進逼。
 
「掛住你囉！」佢終於講出口，終於親耳聽到「掛住」呢兩個字。